Savens occupà e tuttina vidas? Chamonas en las muntogna svizras cumbattan cunter in trend actual. Cler ch'i po dar ina u l'autra desditga pervia da mal'aura. Ma sche alpinists ed alpinistas reservan il medem mument pliras chamonas sin reserva, daventia quai in problem per la guardiachamona: «Nus avain ina fitg gronda cifra che na cumpara betg senza annullar», di Remo Schläpfer, manader dal sectur communicaziun tar il Club alpin svizzer CAS.
2025 uschè bleras pernottaziuns sco anc mai
Adina dapli uschenumnadas «no-shows» fan fastidis a gestiunarias e gestiunaris da chamonas. Perquai vul il Club Alpin Svizzer CAS uss rinforzar las reglas – cun ina taxa da reservaziun. Supplementarmain è planisada ina campagna da sensibilisaziun, ensemen cun ils clubs alpins da la Germania e da l'Austria che cumbattan cun problems sumegliants.
Tar il CAS vegnan annulladas 40% da tut las reservaziuns. Quai è pli che dubel uschè savens sco en hotels convenziunals. A medem temp sco quai che las cifras da no-show creschentas è l'onn da chamonas 2025 stà in onn da success: i ha dà tantas pernottaziuns en chamonas dal CAS sco anc mai – passa 400'000.
Davart ina taxa da reservaziun vegn decidì mez zercladur a la radunanza da deputadas e deputads: sch'il CAS vul introducir en tut sias passa 150 chamonas ina tala taxa e quant auta che quella duai esser.
Ina da questas chamonas dal CAS è la Glärnischhütte en las alps glarunaisas, sur il lai dal Klöntal. Là èn la fin d'emna sulegliva e chauda da Tschuncaisma er divers viandants ed alpinistas da viadi. La Glärnischhütte sa chatta sin bunamain 2000 meters sur mar. Sin la via vi datti anc surfatschas da naiv.
La fin d'emna da Tschuncaisma è era stada avertura da la stagiun. Guardiachamona Fridli Riegg cuschina gia e spera ch'i vegnian era propi tut ils giasts annunziads.
Ti cuschinas per nagut.
La davosa stagiun n'è quai betg adina stà il cas: «Sche nus avain 90 reservaziuns e mo 70 vegnan, lura vegni stoda grev. Ti cuschinas per nagut.» Cumprà en memia bler, cuschinà memia bler, engaschà memia bler persunal – ina gritta.
-
Bild 1 von 3. La Glärnischhütte sa drizza sco autras chamonas dal CAS tar il cuschinar tenor il dumber da reservaziuns. Qua prepara il guardiachamona Fridli Riegg gist rösti. Bildquelle: SRF.
-
Bild 2 von 3. La guardiachamona Pia Kunz pledescha era per ina taxa da reservaziun. Bildquelle: SRF.
-
Bild 3 von 3. Las chamonas èn durant l'entira stad destinaziuns popularas per alpinists e viandantas. Bildquelle: SRF.
La Glärnischhütte n'è betg in cas singul. Bleras chamonas cumbattian cun il medem problem, di Remo Schläpfer, manader dal sectur communicaziun tar il Club alpin svizzer: «Jau hai udì dacurt d'ina famiglia ch'ha reservà quatter fins d'emna en roda. E lura duvrà be ina reservaziun. Quai na va natiralmain betg.» Pertge fan ins uschia insatge? «Ins vul tegnair avert tut las opziuns, forsa guardar cura che l'aura è ideala.»
Decisiun ils 13 da zercladur
Era la guardiachamona da la Glärnischhütte, Pia Kunz, pledescha per la taxa da reservaziun ch'è vegnida menziunada: «Sche ti reservas pajas ti ina summa. Sche ti na vegns betg, tutgan ils daners a nus. Sche ti vegns, vegni quintà giu.»
Anc n'èsi betg cler sch'i dat bainbaud la taxa da reservaziun u betg. La decisiun prendan ils deputads dal CAS ils 13 da zercladur.