Siglir tar il cuntegn

Header

cuntegn

Cunter la fermezza dal franc Banca naziunala ha cumprà devisas per 110 milliardas francs

La Banca naziunala svizra ha intervegnì l'onn passà en grond stil sin il martgà da devisas. Tut en tut ha ella cumprà valutas estras per 110 milliardas francs. Quai resulta dal rapport da gestiun dal 2020. L'onn avant aveva la Banca naziunal cumprà devisas per be 13,2 milliardas francs.

Quest volumen n'è malgrà sia grondezza nagina surpraisa. Per ils emprims trais quartals eran las cifras numnadamain gia enconuschentas. Dal rendaquint per il 2020 resulta uss, che la Banca naziunala svizra ha intervegnì il quartal final cun 9 milliardas francs.

Quai mussa che las intervenziuns da la Banca naziunala èn sa reducidas en il decurs dals quartals. Uschia aveva la banca cumprà l'emprim quartal devisas per 38,5 milliardas, il segund quartal per 51,5 milliardas ed il terz quartal per 11 milliardas.

Instrument impurtant per mantegnair bass il franc

Intervenziuns sin il martgà da devisas èn in dals instruments ils pli impurtants da la Banca naziunala per evitar ina valitaziun pli auta, betg giavischada dal franc svizzer – quai er anc sis onns suenter ch'il curs minimal tar l'Euro è vegnì suspendì.

Dapi che la crisa da corona è rutt'ora accentuescha la Banca naziunala ch'ella intervegnia – sch'i fetschia da basegn – er pli ferm sin il martgà da devisas. Il franc saja numnadamain anc adina valità ferm.

Ord l'archiv da Radio SRF:

audio
Die Nationalbank warnt vor den Folgen der Corona-Krise
ord Echo der Zeit dals 24.09.2020. Maletg: Keystone
laschar ir. Durada: 4 minutas 38 Secundas.

RTR novitads 09:00

Artitgels legids il pli savens