Stefan Engler daventa il 9avel president dal Cussegl dals chantuns che deriva dal Grischun. Il politicher grischun surpiglia il presidi dal liberaldemocrat Andrea Caroni dal chantun Appenzell Dadora.
La prioritad da Stefan Engler per l'onn presidial è da manar il Cussegl dals chantuns bain tras las debattas cun respect envers ils collegas. Dentant è era la dignitad envers l’instituziun per el d'impurtanza.
Il parlamentari grischun vul rinforzar durant l'onn presidial la qualitad da las leschas che vegnan fatgas. Per el èsi impurtant d'esser in president autentic.
Punct culminant d'ina lunga carriera
Stefan Engler e dapi decennis activ en la politica. L'um da 65 onns ha fatg politica sin livel communal, chantunal e federal. Tant sco president communal da Surava, sco deputà en il Cussegl grond u sco regent dal chantun Grischun è el daventa in politicher enconuschent en il chantun Grischun.
Da surpigliar il presidi dal Cussegl dals chantuns è in punct culminant en la lunga carriera politica.
Nagina festa
Stefan Engler ha decidì da betg far ina festa sco quai ch'igl è tradiziun cura ch'ins daventa president. Pli gugent vul el ir durant l'onn presidial en las regiuns grischunas a sa barattar cun la populaziun. Era il viadi dal Cussegl dals chantuns duai proxim onn esser en las valladas grischunas.
Palc per la Rumantschia
Il mandat vul Stefan Engler era nizzegiar per promover il rumantsch. Cun plazzar durant l'onn presidial differents proverbis rumantschs en il Cussegl dals chantuns vul el far attent sin sia lingua mamma. Gìa ses collega da partida Martin Candinas aveva nizzegia il presidi dal Cussegl naziunal per sensibilisar per il rumantsch.