Gia avant entginas emnas avevan la Partida populara svizra ed ils Verds pretendì ch'ils tests da corona stoppian vinavant esser gratuits. Cunzunt per la glieud giuvna che na possia betg finanziar da sa laschar testar regularmain. Uss survegnan questas pretensiuns sustegn ord la cumissiun d'economia dal Cussegl naziunal. La decisiun persuenter è però stada fitg stretga. Cun 13 cunter 11 vuschs è la cumissiun s'exprimida per ils tests gratuits. Sche quels returnan lura propi è però anc tut auter che cler.
Sustegn plitost pitschen per ils tests gratuits
Auter che da la vart da la PPS e dals Verds na pari betg da dar bler sustegn da las autras partidas. Tranter auter ha p. ex. il vicepresident da la PLD, Andri Silberschmidt, accentuà: Testar saja bain impurtant ma i na possia betg esser che tuts ensemen stoppian pajar ils custs per persunas che na sa laschian ord libra voluntad betg vaccinar.
Er da la vart da l'Uffizi federal da sanadad na sustegnan ins questa argumentaziun. En il segund quartal da quest onn hajan ils custs per tests muntà a 359 milliuns francs. Ch'ils custs per tests repetitivs en scolas e fatschentas sco era per persunas cun sintoms vegnan pajads vinavant, quai saja impurtant. Ma betg da pajar ils tests per tuttas e tuts.
L'ultim pled en chaussa ha probabel il parlament e lez vegn sche tut va sco previs a decider en la sessiun d'enviern davart ils tests.
