La cumissiun per l'electricitad (Elcom) ha annunzià ch'ils pretschs dal provediment da basa d'electricitad van il 2026 levet enavos, restan però sin aut nivel. Ina tipica chasada paja l'onn che vegn en media 27,7 raps per kilowatt-ura. Cumpareglià cun ils custs dal 2025 correspunda quai ad ina reducziun da 1,3 raps per kilowatt-ura. Ch'il quint d'electricitad è en media 58 francs pli bass è principalmain d'attribuir a pli bass pretschs d'energia, perquai che vegls e chars contracts scadan.
Tar las cifras numnadas sa tracti da valurs medianas. Effectivamain varieschan las tariffas aifer la Svizra e tranter ils gestiunaris da las raits, per part ferm. La raschun è ch'ils gestiunaris cumpran a moda differenta lur energia.
Grischun è cas spezial
En il Grischun èsi auter – qua crescha il pretsch en media per 3,6% – cun differenzas regiunalas. Pli chara è l'electricitad l'auter onn surtut en il Partenz, en l'Engiadin'Ota ed en Surselva – entant ch'ils pretschs crodan en l'Engiadina Bassa e las valladas dal sid.
Era en parts dal Vallais, da la Turgovia e da Son Gagl van ils pretschs ensi. La pli gronda midada generala datti en il chantun Lucerna. Là pajan tuts 19% dapli per l'electricitad.
Carta da l'Elcom
Structuras da las tariffas as midan
Tar las tariffas datti a partir dal 2026 novs elements. Dasper las enconuschentas tariffas – sco taxas per il diever da la rait e l'energia u taxas a favur da vischnancas – vegnan introducids custs en connex cun rinforzaments da colliaziuns e cun agids transitorics per producents da fier, atschal ed aluminium. Questa nova tariffa – ch'era fin ussa integrada en la tariffa dal diever da la rait – vegn ussa mussada separadamain, uschia na datti nagins custs supplementars per il consument final.
Models da tariffas dinamics
Cunquai che l'energia vegn producida pli e pli a moda decentrala e cunquai che l'automobilitad e pumpas a chalur vegnan pli e pli derasadas vegnan introducidas tariffas dinamicas. Quellas duain meglierar il grad d'utilisaziun da la rait ed uschia duai la necessitad da bajegiar ora la rait vegnir reducida.