Denunzia penala - Affera da crypto vegn elavurada giuridicamain - Novitads

Denunzia penala Affera da crypto vegn elavurada giuridicamain

Autur: SDA / Onna Riedi

Il Secretariat da stadi per l'economia Seco ha inoltrà en connex cun l'affera da crypto ina denunzia penala cunter nunenconuschent. I va per las probablas manipulaziuns tar ils apparats ch'èn vegnids exportads.

Il Seco haja instradà la denunzia penala il mardi passà pervi da pussaivlas violaziuns dal dretg da controllas d'export, ha il Secretariat da stadi confermà envers l'agentura da novitads Keystone-SDA ed uschia er affirmà in rapport da la Sonntagszeitung.

Ils servetschs secrets da la Germania e quel dals Stadis Unids avevan cumprà ils onns 70 a moda discusa la firma da Zug Crypto SA che produciva ils apparats da cifrar. Uschia duain ils servetschs secrets avair tadlà giu radund 130 stadis. Tenor retschertgas da medias duain las autoritads svizras avair savì da quai.

Procura publica examinescha

Ed er la Procura publica federala ha confermà d'avair survegnì la denunzia. Ina procedura penala n'haja ella dentant anc betg avert. En in emprim pass vegn ella uss ad examinar, sch'i dat in suspect che giustifitgescha da persequitar las renfatschas e schebain il cas è suttamess a las dretgiras federalas.

Tenor il rapport da la Sonntagszeitung sa basa la denunzia sin l'artitgel 14 da la lescha da controllar martganzias. Quella prevesa sancziuns, sch'insatgi fa indicaziuns faussas u incumplettas en ina dumonda, ch'èn decisivas per approvar quella. Il Seco fa valair, ch'el n'avess mai lubì in export, sch'el avess gì enconuschientschas da las manipulaziuns.