Il «Kulturpunkt» a Cuira è zuppà tranter la Planaterrastrasse ed il Coop Quader. Pir cur ch'ins vesa las statuas en colur ed entra en l'edifizi, sentan ins l'atmosfera viva e lucca. Igl è in di chaud, il sulegl splendura atras las fanestras – ma la vaira chalira vegn pir anc.
-
Bild 1 von 3. Il «Kulturpunkt» è in lieu da scuntrada interculturala per occurrenzas, festas, curs ed auters projects. Bildquelle: RTR.
-
Bild 2 von 3. Il sulegl splendura tras las fanestras dal local d'inscunter. Bildquelle: RTR.
-
Bild 3 von 3. Sin ina maisa rendan Amnesty International attent al Di internaziunal dals fugitivs, ils 20 da zercladur. Bildquelle: RTR.
Quatter persunas stattan en la gronda cuschina, in scussal enturn il venter, e miran sin ina dunna gronda cun chavels clers. Monika Capelli è commembra en ina gruppa locala dad «Amnesty International», ed il mument stat ella davant in grond chartun plain conserva cun sosa da tomatas. L'atmosfera è lucca, Monika Capelli ri savens. Quai saja er impurtant, di ella.
Saja quai mangiar, cuschinar, chantar, far musica u dar ballape: Quai ans fa bain. Uschia s’accorschan ins che bler ans collia.
Ensemen cun trais fugitivs cuschina ella pasta cun sosa da tomatas per radund 50 persunas. Tranter ils gidanters è er Arif. Avant var dus onns saja el fugì da la Tirchia. E la fin d'october haja el survegnì ina permissiun da dimora. Uss prepara el la salata.
-
Bild 1 von 5. Arif (segund da sanestra) prepara cun Monika Capelli (terza da sanestra) la sosa da tomatas e la salata. Bildquelle: RTR.
-
Bild 2 von 5. Salata frestga e sosa da salata fatga sezza. Bildquelle: RTR.
-
Bild 3 von 5. En quatter cuschinan els per 50 persunas. Bildquelle: RTR.
-
Bild 4 von 5. La salata vegn lavada e tagliada. Bildquelle: RTR.
-
Bild 5 von 5. Sosa da tomatas da l'Italia. Bildquelle: RTR.
Ch'el saja oz part da la gruppa da quatter che cuschina, saja stà casualitad, di el. «Jau hai vis sin la pagina dad Amnesty International ch'els han gì ina sesida.
Lura sun jau ina giada stà là ed hai gist survegnì la dumonda, sche jau pudess gidar oz cun cuschinar. E jau hai pensà: pertge betg?». La cuminanza fetschia bain ad el, di Arif. «Jau hai gugent da far chaussas cun autra glieud.»
En quest mund vesain nus mintga di dapli violenza, dapli guerra – ma sche nus ans dain fadia d'encleger in l'auter, lura pudain nus far punts e cuntanscher bunas chaussas ensemen.
Era las duas autras persunas che cuschinan oz vegnan da la Tirchia. En la cuschina audan ins ina maschaida da tudestg, curd e tirc.
L'aua da sal buglia plaunet, la salata è preparada. Da dador audan ins adina dapli vuschs, la plazza davant il «Kulturpunkt» s'emplaina pli e pli. Uffants, famiglias, pèrs, amias ed amis sesan a la maisa gronda e discurran in cun l'auter. Curt suenter las 18:00 vegnan ils cuschiniers ord cuschina e beneventan ils giasts. E suenter in curt discurs hai finalmain num: bun appetit.
-
Bild 1 von 3. Davent dal local da dimora vesan ins mo pauc da la cuschina. Bildquelle: RTR.
-
Bild 2 von 3. Ils giasts van per in taglier e dastgan lura ir al buffet. Bildquelle: RTR.
-
Bild 3 von 3. Ils ins èn gia ids per il mangiar, ils auters èn anc vid spetgar e discurrer. Bildquelle: RTR.