L'animal appartegna al triep da Carvina che consista da trais animals creschids e da trais lufs pitschens. Tenor Claudio Zali, il directur dal departament dal territori, sa tracti tar ils chaniels medemamain dad ibrids. Perquai ha la regenza decidì da sajettar l'entir triep, er sche las autoritads federalas n'han actualmain betg anc dà ina lubientscha explicita.
Radioregionale da RSI ha dumandà l'etolog Federico Tettamanti per chapir meglier il cumportament da quests animals. «I pudess esser in ibrid da l'emprima generaziun, damai 50% chaun e 50% luf», explitgescha el. Il problem da quests animals è, ch'els pudessan sa cumportar auter che lufs envers l'uman. Cun in pau sang da chaun èn els disads l'uman e pudessan perquai avair la tendenza da s'avischinar als umans. Ins ha fatg pliras analisas davart trieps ibrids da lufs. Però: Igl è sa mussà, che quests animals ibrids mussan essenzialmain il medem cumportament sco lufs purs. Tuttina n'èsi betg d'excluder ch'in ibrid dal luf sa senta pli bain tar ils umans.
Tenor l'expert svanescha questa ibridisaziun cun il temp, cura ch'ils lufs pitschens sa pareglian cun lufs geneticamain purs. L'existenza da sang dals chauns en ils lufs è dentant in ristg per la furmaziun da novs trieps ibrids.
«Ils ibrids pon ins er identifitgar vi da lur cumparsa: las ureglias che pendan, la colur atipica. Savens vegni tar ils ibrids cun la preschientscha da chauns vagabundants, ma quest fenomen è rar en Svizra grazia ad ina controlla severa da la populaziun dils canins.»