Glindesdi ha cumenzà puspè la scola. Per il pitschen Milio è quai il temp per las preparativas. Il scolar pachetescha sia tastga e metta lien sias pantoflas – il «segn da marca» dals scolars ils pli giuvens da la scola primara. Sco quasi 1'700 auters uffants en il chantun da Neuchâtel vegn quai ad esser ses emprim di da scola.
«El è gia pront dapi in temp», raquinta sia mamma en l'intervista cun l'emissiun 19h30 da RTS. «El na vul betg pli ir en la canorta, malgrà ch'el ha gì bler plaschair là. Jau crai ch'i dat insacura in pass ch'ins sto far. Ussa è il dretg mument per el da cumenzar l'emprima classa.»
Be paucs pass davent da Milio ha lieu la davosa sesida da preparaziun per il persunal d'instrucziun. La sfida è gronda. Il dumber dals scolars da l'emprima classa è creschì en l'entir chantun per 10,8%. Quest augment è d'attribuir al baby boom dal 2021 en Svizra, ch'è stà ina consequenza dals lockdowns ed ha manà a bunamain 90'000 naschientschas – in augment naziunal da 4,5%. Ussa vegnan quests «pops da corona» en scola.
25% daplirs uffants a Val-de-Ruz
La vischnanca da Val-De-Ruz ha in augment anc pli grond ch'il rest dal chantun. «Per Val-de-Ruz importa l'augment passa 25%. Quai po vegnir attribuì a dus facturs: in augment da las naschientschas durant la pandemia da corona, ma era bleras famiglias ch'èn vegnidas a star a Val-de-Ruz. Nus avain repartì e gulivà, avain dentant tuttina stuì avrir ina classa supplementara», declera Ahmed Muratovic, cusseglier communal.
Quest augment da scolaras e scolars na fa dentant betg quitads al chantun Neuchâtel. La novitad dastgass schizunt far plaschair a las autoritads. «Dapi onns avain nus mintg'onn damain scolars en las scolas da Neuchâtel e quai dat era sfidas areguard la cumposiziun da las classas. Ussa avain nus plazza per quests scolars giuvens e sperain che quai giaja vinavant uschia e che quai n'è betg mo in'excepziun», sa legra Crystel Graf, cussegliera dals chantuns da Neuchâtel.
Cun «dialog» emprendais d'enconuscher novitads e debattas da nov. Discutai sur da temas relevants – n'emporta betg en tge lingua naziunala. Nus translatain per vus. Ina equipa da redacziun surregiunala selecziunescha mintg'emna in nov tema, per Vus da debattar. Plinavant datti interessants artitgels or da tut las parts da la Svizra. Ed in tool ch'è vegnì fatg sin basa da la retschertga «Co vai, Svizra?» mussa, nua che Vus essas tar in tema, cumpareglià cun ils auters.
En la Svizra franzosa n'è quest «boom da pops» betg stà da sentir en tut ils chantuns. Tscherts noteschan schizunt in regress dals scolars da l'emprima classa. I resta dentant da spetgar che quest trend cuntinuescha. En general èn las naschientschas en Svizra sa sminuidas dapi l'onn 2022.
