Venderdi saira. Frestgera averta: Ovs, zuchetti, in mez camembert. Ina foto. La chargiar siadora. «Tge poss jau cuschinar cun quai en sut 30 minutas?» Paucas secundas pli tard cumpara in recept sin il telefonin. L'intelligenza artifiziala è daditg dapertut. Ella sustegna tar la planisaziun da vacanzas, formulescha e-mails u resumescha prelecziuns.
Tenor ina retschertga represchentativa da Comparis da la primavaira dovran 76% dals creschids svizzers IA en il mintgadi.
Co duvrain a moda raschunaivla l'IA? Inditgai Vossa idea!
Util, ma betg adina senza donn
Uschè pratica che l'IA è, sa ella era cugliunar. Sper respostas faussas d'assistents dad IA curseschan sin medias socialas adina dapli cuntegns generads dad IA. E per blers vegni pli grev da distinguer tranter realitad e fake.
Quant svelt che infurmaziuns faussas pon sa derasar è per exempel sa mussà avant la votaziun davart l'iniziativa «Nagina Svizra da 10 milliuns», cura che deepfakes davart l'immigraziun en Svizra èn cumpartids sin Tiktok e guardads millis giadas.
L'IA mida la scola ed il mund da lavur
L'IA na mida dentant betg mo quai che nus vesain, mabain medemamain co nus lavurain. Radund 28% da trais milliuns plazzas da lavur examinadas en Svizra èn pertutgadas fermamain da l'IA, quai mussa in studi da l'organisaziun da lavurants «Angestellte Schweiz». Questas plazzas na vegnan betg sfurzadamain reducidas, ma ellas sa midan.
Er en la furmaziun occupa l'intelligenza artifiziala. Scolaras e scolars dovran IA per far pensums u lavurs da diplom. A medem temp sa tschenta la dumonda, co che l'IA po vegnir integrada en moda raschunaivla en l'instrucziun e tge cumpetenzas che giuvenils duain acquistar en il contact cun ella.
Mintga scola è actualmain sezza responsabla tge che giuvenils emprendan davart intelligenza artifiziala. Politicamain stat la Svizra a l'entschatta. Fin uss na datti anc nagina legislaziun cumplessiva specificamain davart l'intelligenza artifiziala. Fin la fin da l'onn vul l'Uffizi federal da giustia elavurar in project da consultaziun davart la regulaziun da l'IA, cun il qual la Svizra vul realisar la convenziun da l'IA dal Cussegl da l'Europa.
Ir enturn raschunaivlamain cun IA: Tgi da Vus ha la meglra soluziun?
L'intelligenza artifiziala vegn a furmar vinavant noss mintgadi. Perquai vulain nus udir Vossas ideas: Tge è in diever raschunaivel da l'IA?