Tuttas scolaras e tuts scolars primars duain emprender ina segunda lingua naziunala. Quai vul il Cussegl federal cuntanscher cun ina adattaziun da la lescha da linguas. El reagescha uschia sin intenziuns da chantuns da la Svizra tudestga che vulan stritgar il franzos or da l'urari.
Il Cussegl federal sa mussa preoccupà da quest svilup. Quai cuntrafetschia a la strategia da lingua dals chantuns.
La varietad linguistica è ina pitga principala da la Svizra. Ella pussibilitescha a nus da chapir in l'auter.
Che tscherts chantuns vulan midar quai «periclitescha l'armonisaziun da l'instrucziun en scola ed il spiert da cuminanza internaziunal», ha ditg la cussegliera Elisabeth Baume-Schneider davant las medias.
Cussegl federal propona duas variantas
En la discussiun na giaja betg be per dumondas pedagogicas. «Ella metta en dumonda la plurilinguitad da noss pajais», ha ditg Baume-Schneider vinavant. «Mo perquai che la matematica è difficila, na datt'ins betg si ella». Il venderdi ha il Cussegl federal avert ina consultaziun per midar la lescha da linguas. El propona duas variantas:
- L'emprima varianta vul francar en la lescha che duas linguas estras ston vegnir instruidas en scola primara – ina segunda lingua naziunala ed englais.
- La segunda varianta lascha als chantuns dapli libertad: L'instrucziun d'ina segunda lingua naziunala cumenza en scola primara e dura enfin la fin dal temp da scola obligatoric.
La consultaziun dura enfin ils 5 d'october 2026.
