L'enviern passà saja stà fitg extraordinari quai che pertutga la mancanza da naiv. Quest facit tira l'Institut da naiv e lavinas a Tavau. L'enviern 2022/23 saja stà pli sitg e pli chaud che normal. Tuttina èn quasi tuttina bleras persunas mortas en lavinas cumpareglià cun la media dals davos 20 onns.
L'enviern passà èn 15 persunas mortas en lavinas en Svizra. Ina persuna vala anc sco sparida. Tenor l'Institut da naiv e lavinas a Tavau eran tut las unfrendas sportists u sportistas d'enviern che sa chattavan en territori betg segirà. Nov da las unfrendas faschevan turas e sis eran sin viadi sper las pistas. En tut hai dà 118 lavinas da donns – cleramain pli paucas ch'en la media da blers onns.
Pauca naiv
Gia il november hai be dà naiv en ils auts sur 2'000 meters sur mar. Las autezzas medias (1'000 fin 2'000 meters) èn be stadas cuvertas cun naiv temporarmain. E sut 1’000 meters ha la naiv be curclà singuls dis amez december, fin schaner e mez mars. L’autezza da la cuverta da naiv è stada l’entir enviern sut la media. Tranter mez favrer e mez mars è l’autezza da la naiv stada en tut las Alps svizras uschè pitschna sco anc mai dapi ch’ins mesira.
