Radund 20 passagiers dals 250 ch’èn arrivads la dumengia cun l’aviun da la China en Frantscha han mussà sintoms d’ina infecziun cun il virus da Corona. Entant èn quels però vegnids testads negativ sin il virus. Tar ils passagiers evacuads sa tractia da Franzos e burgais dad ulteriurs pajas da l'Europa. Els ston uss anc passentar almain duas emnas en quarantina.
Gia avant che partir vers l'Europa avevan ils passagiers stuì absolver tests da sanadad a Wuhan. E durant il sgol han els stuì purtar mascras da la fatscha. Sco ch'igl è da vesair sin videos en medias socialas, ha il persunal en l'aviun purtà vestgids da protecziun.
Dumber d'infecziuns crescha vinavant
Entant annunzia la China gia il segund di en seria in ferm augment dal dumber da persunas ch’èn pertutgadas dal nov virus da Corona. La dumengia sajan 57 persunas mortas – han communitgà las autoritads a Peking. Uschia è il dumber da mortoris s’augmentà sin actualmain 362. Cun excepziun dad in cas sin las Filippinas èn tuttas persunas mortas en la China.
Experts quintan che bunamain 17’000 persunas sajan s’infectadas en l’entir mund. Plinavant sajan bunamain 500 persunas sa revegnidas da la malsogna dal lom. Pliras societads aviaticas americanas quintan che las colliaziuns tranter ils Stadis Unids e la China vegnian anc ad esser interruttas per emnas u schizunt mais pervi dal virus.
RTR novitads 06:00
