Siglir tar il cuntegn

Header

cuntegn

Experts da la Confederaziun «La via Svizra po be funcziunar cun in e scadin»

Las mesiras mussian effect. La cifra da novas infecziuns cun il coronavirus giaja enavos. Er la tendenza tar las ospitalisaziuns mussia engiu. Tuttina saja la situaziun anc fragila e las proximas emnas decisivas per il success da la strategia actuala.

Il medi chantunal da Basilea-Citad e suprastant dals medis e medias chantunalas Thomas Steffen sa mussa tranter auter cuntent cun l'obligatori da mascras. Quel vegnia tenor ils ultims resuns resguardà bain. Er ils concepts da protecziun durant la lavur funcziunian e possian evitar bain inqual quarantina.

video
Thomas Steffen: «L'obligatori da mascras vegn acceptà bain»
Or da News-Clip dals 27.11.2020.
laschar ir

Nua ch'el vesa però anc potenzial è en il circul privat. Là pudessia dapli disciplina da la glieud evitar anc bleras quarantinas. E per che la via da la Svizra, en cumparegliaziun cun ils blers pajas da l'Europa speziala, possia funcziunar er a lunga vista, stoppia la gronda part da la populaziun resguardar las mesiras.

Dapi ier hai dà en Svizra 4'312 infecziuns novas dal coronavirus. La media da set dis da las infecziuns novas è sin bunamain 4'000. Tenor l'Uffizi federal da sanadad BAG hai dà en las ultimas 24 uras er ulteriurs 141 mortoris pervi da Covid-19. En total èn uss 4'250 persunas mortas en Svizra en connex cun il coronavirus.

En il Grischun mussan las cifras actualas 80 novas infecziuns ed in'ulteriur mortori.

Actualmain sajan en l'entira Svizra anc 220 plazs da reserva per la tgira intensiva libers en ils ospitals. Tranter auter perquai che las capacidas sajan vegnidas augmentadas.

Svizra survegn vaccin tuttina spert sco auters pajais

Virgine Masserey, la manadra da la secziun controlla d'infecziuns tar l'Uffizi federal per sanadad ha respundì a la dumonda d'in schurnalist pertge che auters pajais sco la Germania discurrian gia da termins concrets per pudair laschar vaccinar e la Svizra anc betg: Quai saja ina differenza da communicaziun e betg da tempo.

La Svizra survegnia il vaccin exact tuttina spert sco noss pajais vischins. La Confederaziun n'haja però anc betg discurrì da termins a partir da cura ch'il vaccin saja accessibel perquai che nagin na possia anc dir quai. Nagin n'enconuschia anc ils resultats da la terza fasa da studi cun ils vaccins.

Pli paucs vulan sa laschar vaccinar

Adina pli paucas persunas en Svizra vulan sa laschar vaccinar cunter il coronavirus. Quai mussa la pli nova retschertga da l'institut da perscrutaziun sin incumbensa da l'Uffizi federal da sanadad. La sceptica creschia. Be la mesadad dals dumandads la fin october, sa laschass vaccinar. Tschella mesadad na vul betg. Tar las retschertgas dal mars, eran quai anc 6 da 10 persunas ch'avessan sa laschà vaccinar.

La retschertga mussa vinavant che la populaziun fida adina pli pauc las infurmaziuns da las autoritads en connex cun corona. L'effect sin la prontadad da vaccinar, da novitads empermettentas da vaccins disponibels ils proxims mais, sappia però pir vgnir eruida en ina proxima retschertga.

Paucs cas da maldiever tar credits da corona

Da var 4'000 cas annunziads, haja be dà tar 260 ina procedura penala, ha ditg Erik Jakob dal Secretariat da stadi per l'economia. Quai na saja betg bler e tar intgins n'haja quai er betg dà intenziuns criminalas. Tschertas fatschentas hajan immediatamain pajà enavos ils daners ch'ellas avevan survegnì nungiustifitgadamain.

RTR novitads 17:00

Artitgels legids il pli savens

Scrollar a sanestra Scrollar a dretga