Quai che vus faschais, savain nus gia daditg. Uschia han ils hockeyans dal CDH Engiadina provocà ils lutgaders da la Societad da lutga engiadinaisa. Suenter ch'ils lutgaders han udì quai in pèr giadas, han els fatg la proposta ch'ils hockeyans vegnan ina giada ad in trenament da lutga. Ed era sche il hockey e la lutga èn dus sports dal tuttafatg differents, datti tuttina tschertas parallelas. Per far omadus sports dovri cundiziun, forza, spertadad e tecnica.
Magari han ils hockeyans dal Club da hockey Engiadina fatg in zichel beffas envers ils lutgaders. Magari han els menziunà envers ils lutgaders che quai che quels fan, fan els gia daditg. Uschia è creschida l'idea dad envidar ina giada ils hockeyans dal CDH ad in trenament da lutga tar ils lutgaders da la Societad da lutga engiadinaisa.
Suenter emprims «spruhs» èn ils hockeyans stads pli quiets
Uschia èsi vegnì ad in trenament da cuminanza tranter lutgaders e hockeyans. L'emprima fasa da sa stgaudar è tar omadus sports sumegliant. Cur ch'igl è dentant ì vi dals differents tegns e moviments, è quai vegnì pli difficil. Cler, ils hockeyans na conuschan betg quai. Il pli tard, cura ch'ils lutgaders han lura fatg la lutga en il resgim, eran ils hockeyans per il pli surdumandads.
Forza han er els, la tecnica dentant, co far la lutga - quella manca. Ed uschia han ils hockeyans emprendì durant il trenament ch'i vul schont insatge dapli che be forza per esser in bun lutgader. A la fin han ils lutgaders gudagnà las lutgas. Els han bittà ils hockeyans en il resgim. Ed il resultat cler a favur dals lutgaders da la Societad da lutga engiadinaisa cloma da far revantscha. Forsa vegni a quella ch'ils lutgaders van cun ils hockeyans sin il glatsch. Lura vegn la situaziun puspè ad esser differenta.
Mollis: paucs dis avant la festa gronda
Las davosas preparaziuns vegnan u èn gia vegnidas fatgas en la vischnanca da Mollis curt avant ch'i va liber. Il pasterner ha preparà ils passa 4'500 cornets cun nusch per ils participants e las participantas dal til, il mazler ha organisà co ch'el po furnir la charn ad uras. L'emprima giada insumma pon producents locals furnir la charn per l'ESAF – avant aveva mintgamai in grossist gì il monopol. La furniziun da tut ils products è mo pussaivel durant la notg. Suenter la damaun da las quatter na dastga nagin pli charrar sin l'areal da festa.
E restricziuns da traffic datti er a l'intern dal vitg. Uschia che differentas persunas u indrizs dovran ina lubientscha excepziunala d'astgar entrar a Mollis. Ina chaussa na dastga la populaziun dentant bunamain betg far durant ils dis da festa: murir. La vischnanca ha numnadamain communitgà ch'i na dettia naginas sepulturas durant quai temp. Perquai il cussegl dal plevon:
A tut las Glarunaisas ed a tut ils Glarunais: Restai sauns!
Opiniuns divididas in mais avant la festa da lutga
Il 2017 ha la vischnanca ditg Gea a la Festa federala da lutga e da gieus alpesters a Mollis. La festa è in dals eveniments ils pli gronds dal sport popular svizzer e vegn organisada mintga trais onns. Sper la lutga datti er tradiziuns sco il mazzaculla e stuschar il crap. Per realisar l'occurrenza vegn fatg quint cun in budget da 35 enfin 40 milliuns francs. Per la fracziun da Mollis cun 3'500 abitants ed abitantas saja quai in eveniment unic. Tscherts èn fieu e flomma per la festa, auters èn plitost sceptics.
Nus ans legrain uschè fitg da pudair preschentar la Glaruna uschia.
Organisaziun da traffic
Ina da las grondas sfidas saja il traffic. Per manischar quel sajan las duas staziuns da tren Näfels-Mollis e Weesen vegnidas engrondidas. La finamira è ch'uschè paucas persunas sco pussaivel prendan l'auto per ch'il vitg stettia senza colonnas da traffic.
Campadis, mattas en champs da massa, chombras privatas u hotel, i dat ina purschida vasta per pernottar. Ils plazs da campar e bunamain tut ils letgs sajan gia occupads. La glieud duai far diever dals plazs da tenda u dals champs da massa. Els duain pernottar datiers da l'areal da festa ed uschia chaschunar uschè pauc traffic sco pussaivel.
I vegn segir ad esser memia bler. Gnanc l'entir chantun n'ha uschè blera glieud. I vegn ad esser fitg surchargià.
Electricitad
Senza electricitad funcziuna pauc, uschia Benjamin Beglinger, manader d'ina fatschenta d'electricitad a Mollis. Els hajan survegnì l'incumbensa da far las installaziuns d'electricitad sur terra sin l'areal da festa. La spezialitad d'in tal eveniment saja la gronda dimensiun da material che saja sin il plaz.
Damai che l'arena è limitada sin 56'500 plazzas, giaudan era blers Glarunais e Glarunaisas la lutga davent da chasa:
Ils cumbats da lutga guard jau en la televisiun – là ves jau quels meglier. Ed ina liongia da brassar datti era là.
La festa ordaifer l'arena pon ins er giudair senza in bigliet – ed uschia esser ina part da la Festa federala da lutga e gieus alpesters.
