A chaschun da l'emprim Festivalet, ch'ha lieu en il club «X-TRA» e la Johanneskirche a Turitg, vegn venderdi saira e sonda suentermezdi, ils 20 e 21 da zercladur 2025, betg mo preschentà e festivà musica rumantscha da tut gener. I vegn er a dar prelecziuns, referats, poetry slam, in program per uffants cun chant e curs da picturar, films ed anc bler dapli ivettas da la vasta paletta da la nossa cultura. E quai cun la finamira da far attent la glieud sin la quarta lingua naziunala.
Nus vulain mussar che nus Rumantschas e Rumantschs essans anc qua. Ch'i dat nus e che nus avain ina cultura ritga, fitg activa ed er fitg moderna.
L'eveniment da dus dis che ha lieu quest onn per l'emprima giada duess esser in lieu d'inscunter, per puspè sa vesair, ma er per emprender d'enconuscher novas persunas – e quai betg mo per Rumantschas e Rumantschs.
Ins speria da pudair dar novs impuls e da cuntanscher cun il program varià in grond public. Concret sa giavischian ins natiralmain millis visitaders e visitadras. Ma sch'i vegnian in pèr tschent saja ins era cuntent, uschia Gion Fry.
Ensatge che fetschia il mument dentant anc in pau mal il venter, saja la prevendita da bigliets. Gion Fry manegia che quai pudess avair in connex cun las massa autras occurrenzas che hajan lieu la fin d'emna a Turitg.
La prevendita marschia betg uschia bain, co ch'ins avess gì gugent. Ma ins haja era nagina experientscha, damai ch'igl è l'emprima giada. E tant sco ch'ins sappia vegni a dar bler a la cassa da la saira.
Il comité d'organisaziun è optimistic ed oravan tut sa legrian ins ch'il temp da spetga suenter prest dus onns preparaziun saja bainbaud a fin.