Da l’entschatta davent ha ella dà gas: Sandra Locher Benguerel è arrivada a Berna ed ha spert pudì s'etablir. La politicra da la Partida socialdemocratica vegn descritta sco lavurusa. Ses dossiers ch’èn per exempel egualitad ni scolaziun e sanadad psichica d’uffants e giuvenilas, enconuscha ella fin sin l'ultim detagl.
Jau hai pudì lavurar vi da mes temas da coc en la cumissiun per scienza, educaziun e cultura. Quai è stà in highlight per mai.
La legislatura che va ussa a fin è stada ina speziala. Ina crisa ha chatschà l’autra: da la pandemia da corona enfin tar la guerra en l’Ucraina e la crisa da bancas. Las crisas han dà en il tact. Tuttina di la politicra grischuna ch’ins haja pudì cuntanscher diversas finamiras – sco per exempel in center naziunal encunter la violenza cunter dunnas. Dentant hai er dà sconfittas per la Socialdemocrata: Il cumbat encunter la revisiun da la segunda pitga n'ha betg fatg effect.
Jau hai pudì metter blers pitschens accents che dattan en la direcziun. E quai ma cuntenta fitg.
En sasez fiss Sandra Locher Benguerel restada gugent en il parlament a Berna. Da chattar maioritads e far punts tranter partidas è gartegià bain ad ella. Perquai era ella era gia enconuschenta en il Cussegl grond. Dentant na basta betg pli il temp per la politica naziunala. Ella ha diversas autras caricas ch’impegnan ella. Uschia è Locher Benguerel en la gestiun da l’Uniun tetgala da la magistraglia svizra. La Socialdemocrata s’allegra dentant da puspè ina giada avair ina fin d’emna senza termins. E quel temp vegn ella ad esser d’inscuntrar en las muntognas. Dentant vegnan a mancar ad ella ils divers inscunters en Chasa federala.
