Radund 40’000 fugitivs ord l’Ucraina ha la Svizra retschavì fin uss. Christine Schraner Burgener che maina il Secretariat da stadi per la migraziun quinta, che quels turnan puspè en lur pajais sche la situaziun lubescha. «Las Ucranaisas ed ils Ucranais na vegn betg a restar en Svizra», ha ella ditg en in’intervista cun la «NZZ am Sonntag».
I saja dentant impurtant ch’els sajan en segirtad en l’Ucraina, e ch’els survegnian agid per reconstruir il pajais. Tenor Christine Schraner Burgener datti gia uss blers che van puspè enavos. Cifras concretas en quest connex n’hajan ins dentant anc betg, ha ella ditg.
Sch'i dettia suenter la guerra tuttina anc fugitivs cun il status da protecziun S che veglian restar en Svizra, possian els far valair motivs d'asil e survegnir suenter tschintg onns ina permissiun da dimora.
