Ellas dattan en egl, las stizuns vitas en la citad veglia da Winterthur. Circa tschintg pertschient da tut ils locals da butias sin la via da cumpra principala èn vids. Quai mussa in'evaluaziun da l'interpresa da cussegliaziun per immobiglias CBRE. E sch'ins dumonda tar il post per la promoziun economica da la citad da Winterthur, lura vesa Andreas Wilke, il manader dal post, duas raschuns persuenter. Tschains da locaziun auts ed ina midada dal cumportament da cumpra.
Per boutiques cun café integrà dovri in concept per la midada d'utilisaziun che las autoritads ston approvar.
Bea Linder da l'uniun Junge Altstadt vesa anc in'ulteriura raschun, quai cunzunt tar novas furmas da butias sco ina boutique cun in café integrà. Là dovria adina in concept per la midada d’utilisaziun che las autoritads ston approvar. E quai na saja per part betg uschè flexibel e spert sco quai ch’ils locaturs novs giavischassan quai.
Chattar schliaziuns e manar ensemen
Mo qua duai ussa in uschenumnà citymanager gidar. Quai pretendan en tutta cass l'uniun Junge Altstadt ed il post per la promoziun economica da la citad da Winterthur. Ina persuna che s'occupa da tut ils problems, tschertga e chatta schliaziuns, maina ensemen ils responsabels da la citad ed ils possessurs da las butias, adina cun la finamira ch'i na dettia nagins locals vids pli en la citad.
Autras citads sco per exempel Lucerna, Son Gagl, Aarau u Schaffusa han gia in temp in tal citymanager. A Schaffusa è Lukas Ottiger dapi dus onns en quella funcziun. La muria da las butias n’haja el betg pudì impedir, ma ussa dettia ina meglra collavuraziun tranter las diversas organisaziuns e la citad. In exempel da quella collavuraziun è il 'First Friday' che ha lieu mintgamai l’emprim venderdi dal mais, nua ch'i dat concerts u uschiglio ina surpresa.
I dovra il sustegn da la citad
Enavos a Winterthur, nua ch'ins è il mument en discussiun cun la citad davart la finanziaziun dad in tal citymanager. E qua dovri il sustegn dal parlament da la citad. Mo uschia èsi numnadamain pussaivel da finanziar quella plazza. Ins quinta cun custs da passa 100'000 francs per onn.
Citymanager er opziun per Cuira
A Cuira èn ins anc lunsch davent da talas discussiuns, era sche la situaziun da las butias en la citad veglia n’è betg gist buna. Quai conferma Yvonne Michel Conrad, la presidenta da l'uniun da quartier da la citad viglia. Er ella vesa ils tschains da locaziun auts sco ina da las raschuns per la situaziun tendida da las butias a Cuira. Sche las entradas tanschian mo gist per pajar il tschains da locaziun saja grev da cuntinuar cun la butia.
Alloschis vids a Cuira
-
Bild 1 von 2. Dapi il concurs avant in onn èn las localitads da l'anteriura interpresa da bellezza Hair and Skin serrads. Bildquelle: RTR.
-
Bild 2 von 2. In nov locatari tschertgan er ils possessurs da questa localitad. Anc da vesair la tavla da l'anteriura butia dad e-bikes. Bildquelle: RTR.
Dapli chapientscha vicendaivla ed ina visiun communabla da tuts, da possessurs e locaturs sco era dals responsabels da la citad da Cuira pudess qua esser in impurtant pass. Tenor ella stuessan tuts vesair la citad veglia da Cuira sco grond e multifar center da cumpra sut tschiel avert. In lieu plain scuvertas, nua ch'ins passenta gugent il temp.
Workshop l'atun
L'uniun dal quartier da la citad veglia haja perquai planisà in workshop per tut ils interessads per sviluppar ideas per il futur da la citad veglia. Ils interess ed ils basegns sajan fitg individuals, di Yvonne Michel Conrad. Perquai saja impurtant da sa discurrer e da chattar ideas per il futur. Forsa lura er en furma dad in citymanager per Cuira.