Il Cussegl dals chantuns ha refusà l’iniziativa cun 32 cunter 8 vuschs, tar quatter abstenziuns. Cun 30 cunter 14 vuschs, e senza abstenziuns – ha il cussegl era refusà d’entrar en la cuntraproposta directa dal Cussegl federal.
L’iniziativa «Na a l'allevament intensiv en Svizra» vul scumandar la tegnida d’animals en gronda quantitad, e francar en la constituziun la dignitad dals animals en l’agricultura. Las novas reglas duain esser almain uschè strictas sco las directivas da Bio-Suisse dal 2018.
Er Na a la versiun dal Cussegl federal
Il Cussegl federal vuleva integrar elements centrals en ina cuntraproposta. Concret fiss quai stà stallas ed auters suttetgs favuraivels als animals, ch’ils animals possian sortir regularmain e da mazzar cun quità animals da niz. El aveva dentant desistì d’integrar las reglas da bio e regulaziuns davart imports.
Suenter ch'il parlament a Berna ha ditg Na a la cuntraproposta directa – decida il suveran svizzer a l'urna davart l'iniziativa.
