Domenica Luzi da Jenaz lavura actualmain sco media d’assistenza en la partiziun d'uffants e giuvenils dal spital chantunal a Cuira. Suenter sis onns studi da medischina e l'examen da stadi ha ella durant ulteriurs sis onns fatg ina scolaziun supplementara sco media spezialisada per uffants e giuvenils. Cun il titel da media spezialisada – per tudestg «Fachärztin» – pudess ella uss per exempel lavurar sur sasezza en ina pratga u prender ina plazza sco media superiura. La dunna da 33 onns ha inoltrà tut ils documents e cumprovas necessarias per survegnir il titel da media spezialisada.
Consequenzas pervia dal temp da spetga
Il titel n'ha Domenica Luzi dentant anc betg. L'instanza responsabla che controllescha sche scolaziuns necessarias èn avant maun e sch'ella adempleschia tut las premissas per il titel dovria actualmain dapli ch'in onn per la controlla ed emetter ils titels. Quai che munta in temp da spetga trais giadas usche lung sco usità. Cun la savida dal lung temp da spetga è Domenica Luzi stada sfurzada da midar ils plans ch'ella avess en sasez gì. Enstagl d'entschaiver a lavurar directamain sur sasezza en ina pratga ha ella tschertgà per ulteriurs nov mais ina plazza sco media d'assistenza. Uschia sto ella nov mais lavurar sut sia qualificaziun, pli pauc sur sasezza e sto acceptar ina perdita da paja. Per notgs senza sien na procuria la situaziun actuala betg. Mo tuttina fatschentia la tematica e surtut en il ravugl collegas medis e medias dettia adina puspe discussiuns.
Jau hai ina tscherta chapientscha per la situaziun, mancanza da persunal dal fatg datti oramai dapertut.
L'instanza responsabla haja questa stad declarà il lung temp da spetga cun mancanza da persunal. Mo Domenica Luzi è da l'avis ch'entaifer in mez onn duessan las persunas che manchian pudair vegnir remplazzadas e nov persunal vegnir introducì. Pia duess uss ansasez esser en vista in meglierament. Actualmain vegnia discutà ina massa sco ins pudess megliurar la situaziun.
Ord mia perspectiva sco pertutgada n ’e nagin meglierament en vista.
Moviment en chaussa
I para dentant da dar in zic moviment en chaussa. En mintga cas tenor ina communicaziun da medias da la Federaziun dals medis svizzers da l'entschatta da november. Las mesiras las pli impurtantas: Il dumber da persunal duess vegnir cumplettà enavant e da nov duess in'emprima valetaziun dals documents inoltrads vegnir examinada a moda e maniera automatica ed uschia accelerar il process.
Jau na ves anc betg che quai vegn propi a midar ina massa.
E persunas che spetga dapli ch'in mez onn sin il titel han mo pli da pajar la mesadad dals 4'000 francs ch'il titel sco medi dal fatg custa. Tenor la media Domenica Luzi è quai pass en la dretga direcziun. Per ella sajan ils pass dentant anc memia pauc concrets.
