Siglir tar il cuntegn

Header

audio
Il futur dals kinos: Sfidas cun pandemia e streaming
Or da Actualitad dals 26.03.2021.
laschar ir. Durada: 03:35 minutas.
cuntegn

Kinos Las sfidas da la pandemia e dal streaming

Il kino è in dals gronds perdents da la pandemia – e quai durant in temp, che la concurrenza da streaming crescha.

Tenor novas cifras da l’Uffizi federal da statistica hai dà 65% damain visitas en ils kinos durant il 2020. E quai durant in temp, cura che la taila gronda ha gia da cumbatter cun ina concurrenza che crescha en furma da plattafurmas da streaming. Il 2018 han las salas da kino gia vendì ils pli paucs bigliets dapi 38 onns. In pitschen augment dal 2019 ha pudì procurar per speranza, ma lura è rivà il coronavirus.

Cineastas e cineasts rumantschs optimistics

Malgrà quellas circumstanzas è Hercli Bundi persvas, ch’i na vegn betg a la mort dal kino. Tenor il reschissur, producent ed autur è la visita en il kino in’experientscha unica, ch’ins na po betg congualar cun mirar films a chasa.

Sper l’aspect tecnic, nua che la taila gronda saja superiura a la televisiun a chasa, saja il kino er in lieu, nua ch’ins sa laschia en sin il film. Ins serria giu il handy, na discurria betg ed ins sa focuseschia sin la preschentaziun.

La responsabladad dal kino è da far ina schelta interessanta.
Autur: Hercli BundiProducent, reschissur ed autur

Impurtant è tenor Hercli Bundi ch’il kino offrescha ina spierta specifica e ch'el fa er reclama per quella. Uschia possian ins cuntanscher in public specific che fa decisiuns sin basa dals films – quai cuntrari al public da plattafurmas da streaming, ch’ha plitost la tendenza da guardar quai che vegn dat avant.

Il barat social è fitg bel, inspirant ed interessant.
Autur: Susanna Fanzunreschissura e producenta

Er la producenta e reschissura Susanna Fanzun è persvasa, ch’il kino surviva e suttastritga quai cun l’aspect social – il barat cun aspectaturas ed aspectaturs avant e suenter il film.

Midaments inevitabels

Tuttina stoppia il kino sa transfurmar en il futur. Tenor il «Nostradamus report 2021», nua che auturas ed auturs fan patratgs davart il svilup dal kino, duess la taila gronda funcziunar er en tschintg onns a moda economica. Il model possian dentant sa midar en ina direcziun pli exclusiva e dinamica. Sco consequenza da la pandemia datti tenor il rapport, che vegn publitgà dal festival da films Göteborg, serradas da kinos.

Susanna Fanzun menziunescha en quest connex ina experientscha dal kino pli cumplessiva. Per exempel possian reschissuras, tecnicists u acturas prender part a discussiuns suenter las preschentaziuns da film. Impurtant saja en emprima lingia, che films vegnian producids vinavant e che la glieud guardia quels films.

Ina tenuta positiva envers il kino datti a la fin er a la Sommeraustrasse a Cuira. Il biro d’architectura Domenig construescha là in cumplex da kino cun otg salas.

RTR actualitad 12:00

Artitgels legids il pli savens

Scrollar a sanestra Scrollar a dretga