Ella saja camuflada a moda perfetga, mussia la diversitad da la vart dal sid da las Alps, ed ella stoppia cumbatter per surviver. Perquai è la litgiva marmorisada il pesch da l'onn 2024, communitgescha la Federaziun da pestga svizra.
Il president da la federaziun Roberto Zanetti di: «Igl è alarmant sch'ins na chatta pli la litgiva marmorisada pli en ils auals da la Svizra dal Sid. Gist quella spezia è stada dominanta per millis onns en quels auals.»
Deplorablamain dettia mo pli la litgiva en la Bregaglia, a Poschiavo ed en il Lago Maggiore. Ed ellas sa maschaidan cun la litgiva dal Rain, scriva la Federaziun da pestga svizra.
Il vestgì marmorisà da la litgiva procuria per in perfetg camuflagi. Il predatur haja in grond appetit. Pitschens peschs sa nutreschian d'insects e giombers da flum, ils gronds da tut tge ch'els pon pudair tiers. Els pon vegnir enfin in meter lungs.
Ils problems da la litgiva marmorisada, u «Marmorata» sin tudestg: Impediments tar la migraziun da peschs e problems da basa da protecziun d'auals. La litgiva marmorisada viagia blers kilometers dal flum si. Sch'i dat impediments, vegn la reproducziun fermamain restrenschida.
