Ella haja analisà intensiv la crisa cun la Credit Suisse e tratg las consequenzas. Uss adatteschia ella sia surveglianza là nua ch’i fetschia da basegn. Quai communitgescha la Finma, en connex cun sia conferenza da medias annuala a Berna.
Sco instruments novs vesa la Finma per exempel la cumpetenza d'astgar reparter multas – u era da pudair communitgar a moda pli activa davart quai ch'ella fa. La Svizra haja uss la pussaivladad da furmar sia plazza da finanzas da l’avegnir – vegn cità la presidenta dal cussegl administrativ Marlene Amstad.
Tegnair en egl ils ristgs da la UBS
Suenter la surpigliada da la Credit Suisse tras la UBS ha la Finma tranter auter rinforzà la surveglianza da bancas grondas. Tar la UBS èn per exempel planisadas 40 controllas al lieu, en Svizra ed a l'exteriur. Ultra da quai datti l'onn current dus gronds tests da stress.
Attenziun dat la Finma cunzunt als ristgs en il rom dal process d’integraziun, e la stabilitad operativa cun manar ensemen la fatschenta cun la CS. Examinar a moda critica vul la surveglianza era ils plans per la stabilisaziun e per cas d’urgenza da la banca cumbinada.
Activitads dal 2023
En tut ha la Finma sclerì l’onn passà 732 giadas aspects da l’applicaziun da las leschas – suenter 850 l’onn 2022. Quai stat en il rapport annual. Vitiers ha ella terminà 27 proceduras cunter societads e persunas natiralas, l’onn avant eran quai 39. E la Finma ha gì success: en tut las proceduras terminadas hajan las dretgiras dà dretg ad ella, hai num en la communicaziun.