Quatter emnas avant las votaziuns davart l'iniziativa da tgira demonstrescha oz a Berna il persunal da tgira. Las radund 5'000 demonstrantas e demonstrants vulan far attent la populaziun sin la crisa en il sectur da tgira, e cunquai er sin la qualitad manglusa da la tgira en Svizra. Il motiv principal perquai saja, che 11'000 plazzas en la tgira sajan mumentan vacantas.
Il persunal da tgira propaghescha per in «Gea» a l'iniziativa – in'offensiva da scolaziun, che la cuntraproposta indirècta prevesa – na saja betg avunda. Tge ch'i dovria, saja ina refurma fundamentala dal sectur da tgira.
L'iniziativa lantschada da l'Associaziun svizra da las tgirunzas e dals tgirunzs AST pretenda che la Confederaziun ed ils chantuns promovan la tgira sco element impurtant dal provediment da sanadad en Svizra. I duai dar avunda persunal qualifitgà, las cundiziuns da lavur duain vegnir regladas e las clamadas duain esser attractivas.
Davart l'iniziativa da tgira po il suveran svizzer decider ils 28 da november.
