Il Cussegl federal vegnia a ponderar mesiras be per persunas betg vaccinadas sche las novas mesiras da corona n’hajan betg l’effect giavischà. Quai ha ditg il president da la Confederaziun Guy Parmelin en la «Samstagsrundschau» da radio SRF.
A partir da glindesdi valan en Svizra reglas da corona pli severas, sco per exempel in obligatori da mascrinas dadens. Sche quai na gidia betg fissi era pussaivel d’introducir l’obligatori da 2G, uschia Parmelin. Quai vul dir che be persunas vaccinadas u guaridas pon visitar tschertas localitads. Sco Parmelin ha ditg vinavant, mussian datas che persunas cun duas dosas da vaccin na stoppin per regla betg vegnir tgiradas sin la staziun intensiva.
Er per Engelberger fiss 2G in'opziun
Per il president da la Conferenza dals directurs chantunals da sanadad, Lukas Engelberger, na vegn in obligatori da sa laschar vaccinar betg en dumonda. Dentant possia el s’imaginar che la «regla da 2G» pudess vegnir introducida dapertut en Svizra. Quai saja almain ina opziun, ha ditg Engelberger en l’intervista cun il «SonntagsBlick» e la «NZZ am Sonntag». La Svizra haja uss anc temp fin mez dal mais dad optimar las mesiras da corona. Sche quai na tanschia lura betg, stoppia l’obligatori da purtar mascrinas vegnir extendì ed er capacitads stoppian vegnir restrenschidas.
