Davent da gievgia fin dumengia naivi en bleras parts dal Grischun. Il pli fitg naivi en il nord dal Grischun, il pli pauc en il sid dal chantun, sco che il meteorolog da SRF Jürg Zogg di. Per posts pli bass saja grev da far prognosas da quantitads da naiv, cunquai che il cunfin da naiv giaja ils proxims dis ensi ed engiu – en autezzas pli bassas sa pudessan pia plievgia e naiv midar giu.
Pli aut che ca. 1'200 meters sur mar nua ch'i naiva senza pausa – en il nord da la Surselva ed en il Partenz – pudessi dar fin 50 cm naiv nova. En general pon ins quintar cun circa 20 – 40 cm naiv nova. En il Grischun dal Sid, pia en Mesolcina, Bregaglia e l'Engiadin'Ota, datti dentant probablamain mo paucas quantitads fin maximalmain 10 cm naiv nova ils proxims dis. Er en il Grischun vegni burascus, sin las muntognas èsi da quintar cun bufs da fin 60 – 100 km/h.
La situaziun per l'entira Svizra
- La gievgia vegn aria chauda nà dal vest. La notg sin venderdi plovi u naivi lura savens. En il sid resti dentant plitost sitg. Il cunfin da naiv s'augmenta sin 800 fin 1'400 meters sur mar. En las valladas, sco per exempel en la Val dal Rodan, resta il cunfin da naiv pli bass.
- Il venderdi ston ins quintar cun stemprads e suffels d'orcan. Il cunfin da naiv sa sbassa fin la saira per part fin en las valladas bassas.
- La sonda datti lura vinavant naiv fin giu en la Bassa, cunzunt a la costa nord da las Alps naivi fitg. A medem temp suffli vinavant fitg en las muntognas.
- La dumengia na suffli e naivi betg pli uschè fitg.
Naiv fin giu en la Bassa
Gia la notg sin gievgia naivi per part fin giu en la Bassa. Cun l'aria chauda che vegn nà dal vest naivi anc pli fitg a partir da gievgia da mezdi, uschia ch'ins sto quintar cun schletas cundiziuns da via.
Da gievgia saira fin venderdi avantmezdi è il cunfin da naiv tar 800 fin 1'400 meters sur mar. En las vals alpinas, sco per exempel en la Val dal Rodan u la Val dal Rain naivi anc pli ditg fin en las valladas bassas.
Il venderdi suentermezdi sa sbassa il cunfin da naiv vinavant.
La sonda e la dumengia avantmezdi naivi per part fin en las valladas bassas ed a la costa nord da las Alps naivi per part senza pausa.
Vent
Il venderdi suffli nà dal nord – uschia ch'i dat ferms suffels da tranter 60 e 90 kilometers per ura – tar lieus exponids schizunt enturn 100 kilometers per ura. En las muntognas datti suffels d'orcan da 120 fin 150 kilometers per ura.
En la Bassa cuntanscha il stemprà ses punct culminant il venderdi, en las muntognas percunter resti burascus era la sonda. Ins sto quintar cun fullas da cuflads. La situaziun da lavinas vegn a daventar pli critica.
Blera naiv nova
I vegn a dar blera naiv nova en las muntognas, cunzunt a la costa nord da las Alps. Spezialmain blera naiv datti en il Vallais Sut. Là vegn spetgà 50 fin 110 centimeters sin passa 1'500 meters sur mar. Er a la costa nord da las Alps vegni a dar 40 fin 80 centimeters naiv nova. Ed era l'autra emna èsi da quintar cun anc dapli naiv.