Fin dumengia naivi en bleras parts dal Grischun. Il pli fitg naivi en il nord dal Grischun, il pli pauc en il sid dal chantun, sco che il meteorolog da SRF Jürg Zogg di. Per posts pli bass saja grev da far prognosas da quantitads da naiv, cunquai ch'il cunfin da naiv giaja ils proxims dis ensi ed engiu – en autezzas pli bassas sa pudessan pia plievgia e naiv midar giu.
Pli aut che ca. 1'200 meters sur mar nua ch'i naiva senza pausa – en il nord da la Surselva ed en il Partenz – pudessi dar fin 50 cm naiv nova. En general pon ins quintar cun circa 20 – 40 cm naiv nova. En il Grischun dal Sid, pia en Mesolcina, Bregaglia e l'Engiadin'Ota, datti dentant probablamain mo paucas quantitads fin maximalmain 10 cm naiv nova ils proxims dis. Er en il Grischun vegni burascus, sin las muntognas èsi da quintar cun bufs da fin 60 – 100 km/h.
La situaziun per l'entira Svizra
- Il venderdi ston ins quintar cun stemprads e suffels d'orcan ed i vegn puspè pli fraid. Il cunfin da naiv sa sbassa fin la saira per part fin en las valladas bassas.
- La sonda datti lura vinavant naiv fin giu en la Bassa, cunzunt a la costa nord da las Alps naivi fitg. A medem temp suffli vinavant fitg en las muntognas.
- La dumengia na suffli e naivi betg pli uschè fitg ed er la naiv lascha suenter il suentermezdi.
Naiv fin giu en la Bassa
Suenter ch'il cunfin da naiv è s'augmentà la notg sin venderdi, sa sbassa quel puspè en il dercurs dal di. La sonda e la dumengia avantmezdi naivi puspè per part fin giu en las valladas bassas. A la costa nord da las Alps naivi per part senza pausa.
A la costa sid da las Alps è il cunfin da naiv in zic pli bass. El è tranter 400 ed 800 meters sur mar.
Vent
Il venderdi suffli nà dal nord – uschia ch'i dat ferms suffels da tranter 60 e 90 kilometers per ura – tar lieus exponids schizunt enturn 100 kilometers per ura. En las muntognas datti suffels d'orcan da 120 fin 150 kilometers per ura.
En la Bassa cuntanscha il stemprà «Goretti» ses punct culminant il venderdi, en las muntognas percunter resti burascus era la sonda. Ins sto quintar cun fullas da cuflads. La situaziun da lavinas vegn a daventar pli critica.
Blera naiv nova
I vegn a dar blera naiv nova en las muntognas, cunzunt a la costa nord da las Alps. Spezialmain blera naiv datti en il Vallais Sut. Là vegn spetgà 50 fin 110 centimeters sin passa 1'500 meters sur mar. Er a la costa nord da las Alps vegni a dar 40 fin 80 centimeters naiv nova. Il glindesdi porta ina front d'aria chauda danovamain in pau naiv. A partir da mardi èsi lura per intgins dis per gronda part sitg ed er vegni puspè pli miaivel.