Tge è ina brev digitala? En sasez n’è ina brev digitala nagut auter che in messadi tramess en scrit, cumparegliabla cun in e-mail u ina brev convenziunala. «Las brevs digitalas tutgan al provediment da basa da la Posta, e da quellas pon ins far diever sch’ins vul», di Nicole Burth, manadra dal servetsch digital da la Posta.
Pertge dovri insumma brevs digitalas? En quest connex di Nicole Burth: «L’e-mail n’è betg ina buna via per barattar datas sensiblas. Tar la brev digitala èn verifitgadas tut las adressas, plinavant è er il temp inditgà.» In sigil electronic garantescha che la brev digitala è vegnida tramessa senza midadas. Quai na permetta betg da far emprovas d’engion sco «phishing». «Cun quest servetsch essan nus per l’emprima giada preschents sin via digitala en il provediment da basa. Uschia observain nus il basegn da la populaziun da garantir segirezza tar la digitalisaziun», uschia la represchentanta da la Posta.
Tge dovri per survegnir ina brev digitala? La premissa è ch’ins sa registreschia ordavant en l’app da la Posta. Questa applicaziun datti sin il smartphone u sin il computer. Per pudair nizzegiar cumplainamain l’app da la Posta ston ins sa registrar. Actualmain sajan gia 1,2 milliuns adressas verifitgadas e radund in mez milliun da quellas hajan gia approvà da retschaiver posta digitala, ha Burth ditg a la conferenza da medias.
Co funcziuna il servetsch? Interpresas ed autoritads u persunas privatas dattan si lur posta a moda digitala. Per quai basta l’adressa postala. La posta surpiglia l'adressat u l'adressata, tscherna sez co ch’el vul retschaiver sia posta: digital en l’app postala u analogamain en la chascha da brevs.
Quant chara è ina brev digitala? Survegnir ina brev digitala è gratuit. I n’emporta betg, sche la brev vegn tramessa fisicamain sco brev u sin l’app. Trametter ina brev digitala custa in porto da 40 raps. Sche l'adressata u l'adressat giavischa che la brev vegn tramessa fisicamain, calculescha la posta supplementarmain ils custs per stampar e per il palpiri. Posta B custa 1,45 francs e posta A 1,65 francs.
Tge capita sch’ins n’ha betg in smartphone? «Persunas senza smartphone pon duvrar l’applicaziun sin il computer», di la manadra Digital Services. E: «Tgi che na vul u na po betg retschaiver brevs digitalas, survegn las brevs squitschadas a l’adressa postala.» Tgi che trametta ina brev digitala via l’applicaziun survegn in messadi, sch’il retschavider survegn la brev sin via digitala u betg. Las brevs vegnan scannadas sut las mesiras da segirezza las pli autas, la gronda part vegn elavurada cun maschinas. «Excepziuns èn brevs che vegnan tegnidas ensemen cun bostitch: ils bostitchs ston vegnir allontanads a maun», ha ditg Burth.
Poss jau survegnir tut la posta digitalmain? Per quai dovr’ins sco persuna privata in abunament per 9,90 francs il mais. Lura vegn scannada tut la posta da brevs.
Dastga il speditur metter a quint a l'adressat ils custs per la distribuziun fisica d’ina brev digitala? Tar quai na dettia naginas prescripziuns, di Nicole Burth. Sche l'adressat sto pajar la brev stampada, dependia da la relaziun vicendaivla.