Energia
Sch’ins ha persequità las novitads da la sessiun d'atun, pon ins constatar ch'i è schabegià ina massa puncto energia. Il parlament ha tractà divers affars d’energia parallel. Ins pudess perfin discurrer d’in pitschen chaos d’energia.
Il luf en mira
Il Cussegl dals chantuns vul che lufs vegnan regulads sco capricorns. Quai vul dir ch’ins definescha onn per onn quants lufs ch'ins po dar liber per la chatscha. Quai vul er dir ch'i fiss nov era pussaivel da sajettar entirs trieps. Il Cussegl dals chantuns ha votà sco emprima chombra cun 31 cunter 6 vuschs per la proposta che sia cumissiun per ambient ha preparà. Il Cussegl naziunal sto pir anc decider en chaussa.
Capacitad da cumpra
Forsa ch'in u l'auter bada gia ch'i restan pli paucs daners en la bursa la fin dal mais. L’inflaziun, la chareschia ed era las premias da las cassas da malsauns – tut crescha. Perquai ha il parlament debattà davart pussiblas mesiras per far frunt a la chareschia.
Novs aviuns da cumbat
Il parlament ha approvà la cumpra dals F-35. Ils 36 aviuns americans duain custar 6 milliardas francs. Suenter ch'il parlament ha dà glisch verda per la cumpra, ha la ministra da defensiun era suttascrit il contract cun ils americans.
La debatta enturn ils aviuns ha procurà per agitaziun. Quai pervi da che la sanestra aveva en sasez ramassà avunda suttascripziuns per ina iniziativa encunter la cumpra dals F-35. Per iniziantas ed iniziants è quai in affrunt che n'è betg democratic.
