«Nus na savain anc adina betg declerar dil tut co quai ha pudì dar talas scenas en nossa citad principala», di il cusseglier guvernativ da Son Gagl e president da la conferenza chantunala da la s directuras e directurs da gustia e polizia.
Var 1'000 giuvenils s’han inscuntrà la fin d'emna passada a Son Gagl. La situaziun è escalada: Chaussas èn vegnidas messas en flommas e molotowcocktails èn vegnids bittads en direcziun da la polizia. Quella ha reagì cun ballins da gumma e perfin in helicopter è sta èn acziun. Igl èn purtrets che han chaschuna tar bleras e blers pel da giaglina.
Las acziuns da polizia da las ultimas duas fins d'emna a Son Gagl han chaschunà custs d'in mez milliun. Tiers vegnan donns da material da 50’000 francs.
E puspè vegn clamà a Son Gagl per ina party illegala per venderdi saira. Dentant er en autras citads svizras vegn clamà per questa fin d’emna a partys illegalas – per exempel a Turitg e Winterthur.
La polizia emprova tut per evitar ch'i dat cravals. Dentant noss corps da polizia èn da principi betg organisads d'esser cun tantas persunas en acziun mintga fin d'emna.
Tiers vegn che sceptichers da corona vulevan demonstrar questa sonda ad Altdorf en il chantun Uri. Il chantun Uri n’ha dentant betg lubì la demonstraziun. Tuttina vegn clamà sin divers chanals dad ir ad Altdorf. La polizia sa prepara en tut la Svizra di Fredy Fässler.
Sco en tut la Svizra persequitescha era la polizia en grischun la situaziun cun attenziun conferma il pledader da medias da la polizia chantunala Roman Rüegg.
Nus observain la situaziun en tut la Svizra fitg precis e reagin tut tenor situaziun. Nus essans era en contact cun la polizia da la citad da Cuira.
Saja quai Roman Rüegg ni Fredy Fässler; Omadus speran ch'ils purtrets da las fins d’emna passadas na sa repetan betg
