A partir da mesemna èsi obligatoric d'annunziar las infecziuns cun la virola da schimgias. Questa decisiun vegn prendida pervia da l'augment d'infecziuns en l'Europa ed en l'America dal nord, sco quai che l'Uffizi federal da sanadad BAG scriva.
Cun l'obligaziun d'annunzia spera il BAG da meglierar las enconuschientschas scientificas, en spezial davart la via da transmissiun dal virus. Ed er da pudair percepir e cumbatter a temp eventualas transmissiuns en Svizra. Annunzias stoppian vegnir fatgas entaifer 24 uras, per ch'ils chantuns pertutgads possian realisar las mesiras per franar la derasaziun da la virola da schimgias.
Quasi 200 cas en Svizra
Fin al venderdi passà èn vegnids registrads en Svizra 198 cas confermads dapi ils 21 da matg 2022. En tut èn enconuschents sin l'entir mund plirs milli cas. Tar il virus da la virola d schimgias sa tracti d'ina varianta main privlusa da la virola extirpada dapi var quaranta onns. La malsogna cumenza cun auta fevra e sa sviluppa spert tar in eczem cun crusta.
Il virus vegn transferì d'animals, probablamain d'animals ruiders, sin ils umans. Er ina transmissiun d'in uman a l'auter è pussaivla, quai en cas da contact direct cun la pel u en connex cun il barat da spida. I dettia in vaccin, però l'organisaziun mundiala da sanadad WHO, na recumonda per il mument betg ina campagna da massa.
L'effect da protecziun d'ina vaccinaziun vegn stimà tenor il BAG sin circa 85%. Intginas datas inditgeschan che la protecziun cunter furmas grevas da la malsogna restia decennis, ma che la protecziun cunter l'infecziun sa reduceschia cun il temp.
