En Svizra ha il dumber da plazzas libras en la tgira cuntanschì in nov record. Il settember eran 5'761 plazzas betg occupadas. L'onn passà eran quai dal medem temp anc bun milli pli pauc e l'entschatta dal 2020 perfin be 3'626 plazzas libras. Cun la situaziun dad oz, saja prest nunpussaivel da tegnair la qualitad da tgira necessaria, uschia l'associaziun da las persunas da tgira envers la «SonntagsZeitgun».
Nus udin da staziuns nua che prest la mesadad dal persunal cun experientscha ha bandunà la plazza. Entras quai crescha il squitsch sin quels che stattan ed i crescha il ristg per sbagls.
Svizra scolescha memia paucs giuvens
Fin il 2029 dovria 80'000 persunas dapli per pudair cuvrir il basegn en la tgira. Entant smetta bun in terz da las tgirunzas e dals tgirunzs uschè spert ch'ellas u els èn a fin cun la scolaziun. Quai ha er mussà il pli nov rapport naziunal davart la situaziun en la tgira.
En spezial mancan las persunas diplomadas cun ina scolaziun d'ina scol'auta. Cnap 4'000 studentas e students han cumenzà l'onn passà questa scolaziun. Necessari fissan dentant 35% dapli. Meglier guardi or tar ils stgalims pli bass. là vegnan cuverts radund 80% dal dumber che fiss necessari.
Bler squitsch – pauca renconuschientscha
Sco Yvonne Ribi da l'Associaziun da las tgirunzas ed ils tgirunzs SBK declera, sajan ins memia ditg partì dal fatg che las bleras persunas che lavuran en la tgira fan quai, perquai ch'i gidian gugent autras persunas. Quest purtret stoppia sa midar, las cundiziuns da lavur stoppian sa meglierar. Perquai ha l'associaziun lantschà l'iniziativa «Per ina tgira ferma» che vegn ils 28 da november davant il pievel. Sis emnas avant la votaziun era la cumpart dal Gea anc tar 82%.
Be scolar na gidia numnadamain betg. Ins stoppia er vegnir da tegnair il persunal en il mastergn. Uschigliò na vegnian ins mai da cuvrir il basegn effectiv.
