Cussegl federal e parlament stattan davant ina decisiun difficila: Vulan els dar in signal a favur da la branscha da farmazia – u in a favur da las pajadras e pajaders da premias?
Concret vai per ina mesira dispitaivla, cun la quala ils custs da sanadad creschents ed uschia er las premias da las cassas da malsauns sa laschassan franar marcantamain. Previs è ina taxa per firmas da farmazia sin medicaments cun ina svieuta spezialmain gronda. Questas entradas duain ir a las assicuranzas da malsauns ed uschia vegnir da bun a tut ils assicurads. Persunas dal fatg discurran en quest connex d'uschenumnads models da successiun dals custs (Kostenfolge-Modellen). La consultaziun en chaussa va uss a fin.
Interpresas da farmazia refusan mesira
Las cassas da malsauns sustegnan questa mesira. Els quintan tras quai cun 350 fin 400 milliuns francs annuals, quai che correspunda ad in pertschient da las premias. Quai vul dir: Lura s'augmentan las premias per exempel per 3% empè da per 4% – in levgiament remartgabel per ils pajataglias.
Las firmas da farmazia refusan la mesira. L'associaziun da branscha Interpharma crititgescha ch'il Cussegl federal laschia uschia ina schanza betg nizzegiada per reagir sin ils novs svilups geopolitics.
Tut sumegliant s'exprima l'Associaziun da firmas da farmazia en Svizra, Vips. Las federaziuns vesan periclità il lieu Svizra e medemamain il provediment da pazientas e pazients cun medicaments.
Svieuta decida taxa
Ils models da successiun dals custs fissan reglads en in reglament . Da quai resulta: I pertutga ils 80 fin 100 medicaments cun la pli gronda svieuta en Svizra che vegnan surpigliads da la cassa da malsauns. Persuenter sto la svieuta annuala surpassar 15 milliuns francs. Las tariffas èn graduadas – pli auta la svieuta e pli auta la taxa – sin ina scala da 15% fin maximalmain 40%. Excepziuns fissan previsas – er sche la segirezza dal provediment è periclitada.
Sin dumonda da SRF fa l'associaziun d'assicuranzas Prioswiss dus exempels cun las cifras dal 2024: Per il medicament cunter cancer Keytruda, in «Kassenschlager» cun ina svieuta netta da 167 milliuns francs, avess la producenta stuì restituir radund 45 milliuns francs a las cassas da malsauns. Per Ocrevus che vegn duvrà tar la sclerosa multipla, cun ina svieuta netta mez uschè gronda fiss quai stà radund 18 milliuns francs (cifras: Helsana).
Partidas n'èn betg perina
Malgrà che l'idea da quests models da la successiun dals custs è vegnida da la PLD, vulan uss las forzas burgaisas en il parlament sa retrair da quai: La PPS, la PLD e la Partida dal Center vulessan – u spetgar enfin ch'ils resultats da la gruppa da lavur davart il lieu da farmazia e life-science èn avant maun, u dentant reducir marcantamain las restituziuns.
Sa tegnair vi da las restituziuns en la dimensiun planisada vulan percunter la PS e la Partida verda – els renvieschan a l'effect da franar ils custs e na vulan betg sa laschar «extorcar» da la farma.