Marcel Dettling vul surpigliar il presidi da Marco Chiesa. Quai aveva el ditg en in'intervista cun il Blick: «La decisiun è prendida», uschia l'um da 42 onns. Fin tar il davos termin era Dettling il sulet candidat ch'è s'annunzià per il presidi.
Candidat da giavisch
Marcel Dettling valeva gia ditg sco favurit per il post. Er per la cumissiun da chattar in nov candidat u candidata è el il candidat da giavisch. Era il fatg che nagin'autra persuna è s'annunziada per daventar presidenta u president mussia che Dettling po quintar cun grond sustegn.
Marcel Dettling è da Oberiberg (SZ) ed è pur. Sco president vul el metter sin temas ch'han fatschentà la populaziun, per cuntinuar cun il success da la PPS a las ultimas elecziuns naziunalas. Quai aveva el annunzià en l'intervista cun Blick. Sco exempel ha el numnà la limitaziun da «l'immigraziun exagerada».
L'elecziun dal nov president da la PPS vegn ad esser ils 23 da mars.
