La Pro Natura ha nominà il telpi sco animal da l'onn 2024. L'animal che tutga tar la famiglia dals mustailids è in nomad che va a chatscha la notg e vegn classifitgà sco animal vulnerabel sin la glista cotschna d'animals periclitads.
Per che quel possia sa revegnir dovria ina rait da la natira sur l'entira Svizra, uschia la Pro Natura. Il telpi dovria la protecziun da bostgaglia, mantuns da crappa, foss e dutgs per sa zuppar. Questa rait da vias saja per gronda part destruida en Svizra.
Anc la mesadad da l’ultim tschientaner saja il maletg da la cuntrada cultivada svizra stà marcà fermamain da structuras pitschnas. Dapi decennis vegnan dentant allontanadas chaglias ed auals vegnan emplenids cun terra, perquai che quellas engrevgiassan il diever da maschinas en l’agricultura.
La protecziun da quests spazis da viver dal telpi vegnian tenor la Pro Natura era dabun ad auters animals sco ils rustgs u las raunas.
