La cumissiun da la dretgira dal parlament ha l'incumbensa da tschertgar in candidat pussibel sco nov procuratur public general. Els proponan in candidat a l'Assamblea federala, ch'elegia lura il procuratur.
La cumissiun n'ha dentant chattà nagin candidat adattà. Nagin dals dus candidats en la runda finala haja las abilitads persunalas e professiunalas per manar uschia in post exponì.
En la runda finala èn stads il procuratur public friburgais Andreas Müller ed il procuratur public general dal chantun Genevra, Olivier Jornot. Davart Jornot hajan differentas commembras e commembers da la cumissiun gì dubis, surtut davart ses caracter. Quai han mussà retschertgas da SRF.
Co vinavant?
La cumissiun da la dretgira dal parlament scriva uss or da nov la plazza. Vinavant duai la limita da vegliadetgna per la procuratura u il procuratur public vegnir auzada sin 68 onns.
L'Assamblea federala plenara duai decider durant la sessiun da primavaira davart la successiun da Michael Lauber.
