Siglir tar il cuntegn

Header

Cédric Wermuth
Legenda: Il co-president da la PS Cédric Wermuth durant la radunanza da delegads. Keystone
cuntegn

Radunanza da delegads PS «La cunvegna da basa en questa furma è inacceptabla»

A la radunanza da delegads da la PS ha il co-president Cédric Wermuth tegnì in pledoyer per in'Europa unida.

Wermuth ha dentant er refusà la cunvegna da basa da la Svizra cun l'Uniun europeica en la furma actuala. Quella aboleschia la protecziun da paja e saja uschia inacceptabla per la democrazia sociala, ha ditg Wermuth a las delegadas ed ils delegads.

Nus na vulain betg damain Europa, mabain dapli Europa. Dentant era resolut auter.
Autur: Cédric WermuthCp-president da la PS

Il cumbat per ina meglra protecziun da paja e servetschs publics undraivels saja in cumbat europeic, in cumbat per l'Europa sociala. La protecziun da paja saja il fundament da la democrazia sociala. Quest cumbat na fetschia la PS betg cunter l'Uniun Europeica, mabain communabel cun autras partidas da la sanestra e sindicats en l'entira Europa.

Berset avertescha da povradad

Cusseglier federal Alain Berset avertescha d'in foss creschent tranter ritg e pover. Anc main hajan ins discurì tant da solidaritad sco durant la pandemia da corona ha ditg il minister da sanadad a la radunanza da delegads da la partida socialdemocratica.

Blers problems ch'eran gronds gia avant la crisa sajan uss anc pli gronds. Ils proxims onns vegnian diffizils ed il pli diffizil per ils flaivels, er en noss pajais, uschia Berset. El ha pledà per dapli egualitad e gistadad.

Las parolas èn cleras

Ils delegads e las delegadas da la PS han la sonda er decis duas ulteriuras parolas per las votaziuns dals 13 da zercladur. In cler «gea» datti per la lescha da Covid-19, in cler «na» per las mesiras polizialas per cumbatter il terrorissem. Questa lescha unfreschia la protecziun dals dretgs umans per il cumbat cunter il terrorissem, senza ch'ella portia dapli segirezza a la Svizra.

Gia il favrer aveva la partida ditg trais giadas gea a l'iniziativa per aua da baiver netta, l'iniziativa da pesticids ed a la lescha da CO2.

En pli han ils Socialdemocrats decis la sonda las parolas davart la «lètg per tuts» e la in'iziativa da 99 pertschient. Quella pretenda ch'ins sto pajar dapli taglia per entradas or dal chapital. Las duas fatschentas vegnan probabel ils 26 da settember ni ils 28 da november da quest onn a l'urna. Ina data n'è dentant anc betg fixada.

Ord l'archiv da 10vor10:

video
Cunvegna da basa cun l'UE: La cuntraversa da la PS
Or da 10 vor 10 dals 28.04.2021.
laschar ir

RTR Novitads 14:00

Artitgels legids il pli savens

Scrollar a sanestra Scrollar a dretga