Las iniziativas agraras han mobilisà surproporziunalmain blera glieud a l'urna. Ina fitg gronda mobilisaziun en las regiuns da champagna era lura er motiv che las iniziativas agraras han fatg naufragi. Plinavant han quellas persunas er dà il stausch che la lescha da Co2 è vegnida sbittada. En las regiuns ruralas era la resistenza cunter quella lescha pli gronda ch'en ils centers urbans.
La retschertga da gfs.berna mussa che l'aspect finanzial era stà in dals arguments principals per il Na a la lescha da Co2. In pli aut pretsch per ieli u benzin per exempel. Refusà la lescha han surtut persunas che vuschan per la PPS, la PLD u l'Allianza dal center. Persunas pli giuvnas hajan percunter beneventà pli ferm la lescha.
La participaziun da votar dals 13 da zercladur era stada auta. Tranter 59,5% e 59,7% da las votantas e votants han vuschà. Tenor gfs.berna hai mo durant quatter autras votaziuns gì ina pli gronda participaziun.
