Cunter l’opiniun da blers politichers avess la cunvegna da basa cun l’Uniun europeica bunas schanzas tar ina votaziun dal pievel. Quai rapporta la «NZZ am Sonntag» che sa basa sin ina retschertga da l’institut gfs.berna davart la politica d’Europa. Tenor quella schessan 64% dals dumandads Gea u plitost Gea a la cunvegna da basa. Be 32% refusassan ella. Quai na saja dentant betg la suletta surpraisa.
Er il pli impurtant argument da la sanestra e dals sindicats, numnadamain la protecziun da paja, vegnia survalità. Bain sajan 60% dals dumandads da l’avis che la cunvegna flaivlentass la protecziun da paja, dentant na saja quai betg ina raschun da dir Na a la cunvegna – gnanc per quels da la sanestra, uschia la «NZZ am Sonntag» vinavant.
Fatg part da la retschertga han 1'000 persunas da l'entira Svizra cun dretg da votar. La retschertga è vegnida fatga per incumbensa da l'associaziun professiunala Interpharma.
