Il coc dals adversaris da vaccinaziuns entaifer la populaziun saja dapi il 2019 sa reducì levet da 12% sin 10%. Quai demussa ina retschertga represchentativa dal servetsch da cumparegliaziuns Comparis. Be 15% da las persunas dumandadas en la Svizra tudestga, hajan inditgà che lur tenuta saja sa midada ferm pervi da la pandemia.
La debatta davart la vaccinaziun cunter Covid mussia, quant impurtant ch’i saja d’infurmar la glieud. En consequenza da la pandemia saja la populaziun infurmada bler meglier davart il tema vaccinar. Avant la pandemia n'hajan anc 17% dals dumandads betg savì cunter tge malsognas ch’ellas sajan vaccinadas. L’october da quest onn haja quest dumber anc muntà a 7%.
Per la retschertga ha l’institut da perscrutaziun dal martgà Innofact dumandà per incumbensa da Comparis radund 700 persunas en la Svizra tudestga.
