Il concern da telecommunicaziun Sunrise ha fatg dapli svieuta l'emprim quartal da quest onn. La svieuta da var 460 milliuns francs munta in plus da bunamain 3% cumpareglià cun la medema perioda da l'onn passà.
Sco Sunrise scriva, sentan dentant er els la crisa da corona. Il mars haja dà damain svieuta da roaming, persuenter dapli telefons en Svizra ed en las raits internaziunalas. L'avrigl saja il roaming restà fitg bass, entant ch'ils volumens da telefons sajan sa reducids in pau cumpareglià cun il mais avant.
Perspectiva sur onn pli mala
Per l'emprim quartal ha Sunrise surpassà las aspectativas dals experts. Ma guardà sur l'entir onn spetga l'interpresa dentant damain svieuta – radund 40 milliuns pli pauc che avant in onn.
