Las decisiuns en survista:
Themen in diesem Newsticker
- Umens duain decider tranter protecziun da catastrofas u armada
- Engrondir l'armada, ma senza ulteriuras investiziuns en muniziun
- Dapli segirtad finanziala suenter divorzis sin manaschis purils
- Glisch verda per revisiun parziala da la lescha da cartel
- «Vapes» a diever unic vegnan scumandads en Svizra
- Parlement dat glisch verda a credit per Horizon Europe
- Lescha da tubac è sut tetg
- Taglia individuala quasi sut tetg – manca mo la votaziun finala
- Debatta parlamentara davart «200 francs bastan» è lantschada
- Per vita duranta duai muntar almain 17 onns en Svizra
Tranter auter debatta il Cussegl naziunal durant las trais emnas da la sessiun da stad davart l'iniziativa «200 francs bastan», lantschada da circuls da la PPS. En il center da quella stat la dumonda, sche las taxas da radio e televisiun duajan vegnir reducidas d'actualmain 335 francs sin 200 francs.
La cumissiun responsabla refusa l'iniziativa cun ina clera maioritad. Il Cussegl federal ha gia annunzià da reducir las taxas da recepziun d'actualmain 335 sin anc 300 francs ad onn, quai enfin il 2029. Ultra da quai vul el deliberar bleras interpresas da l'obligaziun da pajar la taxa. Las debattas en il Cussegl naziunal èn probablamain terminadas pir la segunda emna da la sessiun.
Sper quella iniziativa sa fatschenta il Parlament federal era cun iniziativas che vulan in fond per il clima, scriver la neutralitad da la Svizra en la Constituziun u garantir che las Svizras ed ils Svizzers pon er en l'avegnir pajar cun daners bluts las cumpras en stizun.
Dapli daners per l’armada
Stgars 1,7 milliardas francs dumonda l’armada svizra per cumprar material d'armament e per modernisar alloschis per truppas. Ultra da quai duai la fin da la Patrouille Suisse ed ils aviuns F-5-Tiger vegnir sigillada. Quai èn ils puncts centrals da la missiva da l'armada 2025, cun la quala il Cussegl naziunal s'occupar sco emprim en chombra.
La cumissiun predeliberanta va d'accord cun ils projects da l'armada, vul però cumprar spertamain muniziun per la defensiun cunter privels ord l'aria. Correspundentamain vul ella augmentar il program d'armament per 1 milliarda francs. La maioritad è da l'avis ch'i saja absolutamain necessari che la Svizra possia far contracts a temp e ch'ella possia uschia segirar termins da furniziun per la muniziun. La minoritad crititgescha ch'i saja anc betg reglà co la cumpra supplementara duai vegnir finanziada.
Tgi paja la 13avla renta d’AVS?
Avant passa in onn ha il suveran ditg Gea a la 13avla renta d’AVS. Ina gronda dumonda resta dentant: co finanziar quella renta supplementara che custa passa 4 milliardas francs mintg'onn?
Il Cussegl federal vul finanziar la 13avla cun augmentar la taglia sin la plivalur per 0,7 puncts procentuals – d'oz 8,1% sin 8,8%. La cumissiun dal Cussegl dals chantuns vul qua dentant prender in'autra via: Ella propona – cun 0,5 puncts procentuals –in augment da la taglia sin la plivalur pli miaivel ch'il Cussegl federal per finanziar la 13avla. Il medem mument duain dentant era las deducziuns da paja crescher, mintgamai per 0,1 puncts procentuals da vart dals patruns e dals emploiads.
Co la 13avla renta d'AVS vegn la finala propi finanziada vegn anc a caschunar per intginas discussiuns en la Chasa federala. Cler èn dentant duas chaussas: Davart l’augment da la taglia sin la plivalur vegnan las Svizras ed ils Svizzers anc a decider a l'urna – e l’emprima 13avla survegnan las persunas che vegnan pensiunadas il december da l'auter onn. Quai ha il Cussegl federal fin ussa gia decidì.