Sessiun extraordinaria 2026 - Cussegl naziunal vul che Confederaziun planisescha ils ospitals

Las decisiuns en survista

• Cussegl naziunal vul planisaziun d'ospitals federala
• Nagin access a pornografia per minorens
• Invista digitala en dossiers AVS ed AI
• Iniziativa da tgira: Cussegl naziunal decida versiun reducida
• Basilea survegn betg dapli represchentanza
• Schluccar las reglas per il temp da lavur da persunas cun buna pajas
• Tractament da Sinti e Jenics è stà crim cunter l'umanitad

Intgins dals temas che vegnan discutads a Berna:

Tgira: dispita pervia da meglras cundiziuns da lavur

En il center da la debatta stat la segunda etappa da la realisaziun da l'iniziativa da tgira che la populaziun ha acceptà l'onn 2021. Entant ch'il Cussegl federal propona temps da lavur pli curts ed ina meglra planisabladad dals servetschs, s'engascha ina maioritad burgaisa da la cumissiun dal Cussegl naziunal per dapli atgna responsabladad dals partenaris socials e refusa mesiras pli vastas per motivs da custs.

Digitalisaziun da las instituziuns socialas

In ulteriur tema è l'introducziun da la «plattafurma electronica 1. pitga» che duai pussibilitar a las persunas assicuradas in access digital a lur dossiers tar l’AVS e tar l’Assicuranza d'invaliditad. Entant che la cumissiun cumpetenta sustegna da princip il project, expriman represchentantas e represchentants da la PPS resalvas e pretendan ch'ils chantuns vegnian resguardads pli fitg.

Natiralisaziun: Reglas unifitgadas u cumpetenza federala?

L'iniziativa per la democrazia che ha en mira ina unificaziun da las leschas da natiralisaziun sin plaun federal chaschuna per discussiuns. L'iniziativa pretenda che persunas estras survegnian il dretg da vegnir natiralisadas gia suenter 5 onns e quai en tut la Svizra. La maioritad da la cumissiun dal Cussegl naziunal ed il Cussegl federal èn dentant cunter l’iniziativa.