Siglir tar il cuntegn

Header

Bursa
Legenda: Keystone
cuntegn

SMI Crash a la bursa svizra

A la bursa svizra èsi danovamain vegnì tar in crash. Il barometer da bursa SMI è crudà la gievgia fin la saira per - 9.6% sin 8'270 puncts. Anc oz a bun'ura aveva la bursa avert cun 9'152 puncts. Igl è la pli gronda sfundrada da la bursa dapi 30 onns. La raschun è, tenor analists, ch’ils Stadis Unids han annunzià da scumandar a persunas da l’Europa d’entrar en il pajais pervi dal coronavirus, sco er che la Organisaziun mundiala da la sanadad ha declerà ch'i regia il mument ina pandemia dal coronavirus.

Plinavant dettia malsegirtads a la bursa pervi da la dispita dal pretsch d'ieli, hai gì num a la bursa. Tranter la Russia e l’Arabia Saudita regia actualmain ina guerra da pretschs. En consequenza è il pretsch d’ieli sa sbassà il glindesdi per passa 30%. L'emna passada avevan ils discurs davart ina reducziun da l’explotaziun d’ieli tranter l’OPEC e la Russia fatg naufragi.

Banca centrala europeica reagescha

Oz suentermezdi ha la banca prendì differentas mesiras per minimisar las consequenzas ch’il coronavirus ha sin l’economia. Tranter auter veglia ella cumprar dapli titels d’emprest. Plinavant duai dar novs credits d’urgenza per bancas.

Per ils titels d’emprest metta la banca a disposiziun 120 milliardas euros enfin la fin da l’onn. Credits a cundiziuns favuraivlas duain intimar las bancas da dar ora dapli credits, surtut a branschas e firmas pertutgadas. La finamira da las mesiras è da gidar ad interpresas pitschnas e mesaunas.

Artitgels legids il pli savens

Scrollar a sanestra Scrollar a dretga