Ils livels da l’aua dal Walensee, Lai da Constanza, Lai dals Quatter Chantuns e Lai da Lugano èn uschè bass sco anc mai. Unicamain il Lai da Thun ed ils lais a l’ur dal Giura hajan in livel mediocher, ha ditg l’Uffizi federal d’ambient (Bafu) sin dumonda da l’agentura da novitads SDA. Era ils flums mainan uschè pauca aua sco mo mintga 2 fin 20 onns. Il Rain e la Reuss èn sin in livel uschè bass sco anc darar mesirà la stad.
Era la plievgia ch’è prognostitgada per quest’emna na mida betg la situaziun. Be ils dutgs e flums pitschens pon sa revegnir per in tschert temp. Era il livel da l’aua sutterrana è fitg bass. Quel pudess la plievgia auzar localmain.
Pervia da l’aura chauda lieuan er ils glatschers pli fitg ch’usità – ina tendenza che cuntinuescha tenor las datas dal Bafu.
Per ils peschs che pateschan gia l’entira stad èn quai schlettas novitads. L’aua pauc profunda sa stgauda pli svelt che l’aua profunda, spezialmain nua ch’i n'ha nagina vegetaziun a la riva che po render sumbriva. Per ils peschs è l’aua chauda nuschaivla, enfin mortala, quai mussa quant impurtantas che auas renaturadas èn per ch’ils animals pon surviver.
