Almain otg milliuns dosas da vaccins cunter Covid-19 duai la Svizra survegnir fin la fin da fanadur. Quai ha ditg il minister da sanadad Alain Berset a las medias suenter in inscunter cun represchentantas e represchentants dals chantuns, da la task force e da las firmas Moderna e Pfizer/Biontech che produceschan ils vaccins.
Dapi il schaner èn vegnidas squittadas 1,25 milliuns dosas vaccin a persunas vulnerablas en Svizra. Quai haja calmà marcantamain la situaziun en las chasas d'attempads e da tgira, uschia Alain Berset.