Siglir tar il cuntegn

Header

cuntegn

Suenter accident mortal Uffizi federal da traffic intervegn tar SBB

Las Viafiers federalas ston laschar controllar d'ina firma externa l'organisaziun sco er ils process dal mantegniment dals trens. Quai pretenda l'Uffizi federal da traffic tranter auter perquai che la SBB ha chattà tar controllas extraordinarias suenter l'accident mortal da l'entschatta avust passa 500 mancanzas mo vi da las portas.

audio
Pledader da l'uffizi federal Michael Müller declera decisiun
ord Actualitad dals 23.08.2019.
laschar ir. Durada: 23 Secundas.

En tut sajan vegnidas controlladas entant passa 1'500 portas ha la SBB communitgà oz. 66 da questas mancanzas èn relevantas per la segirezza. Il schef da las Viafiers federalas, Andreas Meyer, ha ditg ch'el saja surstà quants sbagls ch'ins ha chattà fin uss.

Tantas mancanzas n'avain nus betg spetgà.
Autur: Andreas Meyer CEO Viafiers federalas svizras

Tar ina conferenza da medias han las Viafiers federalas prendì posiziun: Ellas vegnian a far tut lur pussaivel per eliminar las mancanzas, dian ils responsabels.

Ulteriuras mesiras

L'Uffizi federal da traffic ha plinavant decidì che las Viafiers federalas ston remplazzar il sistem da controlla da las portas da tren automaticas. Tar las controllas n'haja la protecziun da «serrar en» betg funcziunà set giadas. Igl è il sistem che aveva numnadamain desditg tar l'accident mortal.

Cun quella disposiziun suonda l'Uffizi da traffic a la recumandaziun dal Servetsch svizzer d'inquisiziun da segirezza (SUST). Quel ha publitgà la mesemna in rapport intermediar davart l'accident. Quel è stà l'entschatta avust a Baden. In accumpagnader da tren è vegnì serrà en da la porta dal tren. Sinaquai è l'um vegnì stratg cun dal tren ed è mort.

RR novitads 12:00

Artitgels legids il pli savens