La promoziun dal sport tar uffants e giuvenils haja ina gronda muntada per il Cussegl federal. Per renconuscher quella vegn il credit – actualmain 115 milliuns francs ad onn – augmentà. Anc quest onn duai dar 20 milliuns francs dapli credit, e l'auter onn lura 28 milliuns dapli. Il Cussegl federal curregia cun quai sia decisiun dal zercladur da scursanir ils meds.
La decisiun finala davart l'augment dal credit ha il parlament federal. Cun quai che blers parlamentaris e parlamentaris èn s'engaschades per la promoziun dal sport, na quintan ins betg cun gronda resistenza.
Ferma critica
La critica era ferma suenter l'annunzia dal Cussegl federal che las subvenziuns per Giuventetgna+Sport (J+S) vegn scursanida per 20%. Il motiv era ch'il budget previs – en tut 115 milliuns francs per l'onn 2024 – era vegnì duvrà dal tut. Enstagl d'augmentar il budget vuleva la regenza scursanir las contribuziuns per las singulas uniuns.
Il Grischun fiss stà pertutgà cun 500'000 francs pli pauc. Il manader da la partiziun sport da l'Uffizi chantunal per scola populara e sport, Thierry Jeanneret aveva numnà quella decisiun «displaschaivla». Ins saja s'engaschà per dapli uffants e giuvenils en il sport – e quai cun success. Ins haja nudà dapli persunas, sco er dapli disciplinas da sport. Ma gist quest success procuria ch'ils meds stoppian vegnir scursanids.