Cun Chiara Leone è era l'actuala campiunessa olimpica da la partida als campiunadis europeics da tir en il liber a Châteauroux en Frantscha. La Svizra è ida per aur ils 2 d'avust 2024 sin quest implant a Châteauroux als gieus olimpics. L'emprima giada da la partida en la gruppa d'elita è la Grischuna Annina Tomaschett. Nus avain discurrì cun ella avant ils campiunadis:
Las concurrenzas d'elita da las dunnas e dals umens han lieu ils 26 e 27 da fanadur e quels da las junioras ed juniors il 31 da fanadur. Sajettà vegn en pliras disciplinas. Per la Svizra èn 22 atletas ed atlets vegnids selecziunads da la Federaziun Svizra dal sport da tir:
La Federaziun svizra dal sport da tir: 200 onns istorgia e tradiziun
La Federaziun svizra dal sport da tir (SSV) guarda enavos sin ina lunga istorgia. Il SSV è vegnì fundà l'onn 1824 sut il num «Uniun svizra da tiradurs». Uschia è ella ina da las federaziuns da sport las pli veglias da la Svizra insumma. Quai scriva la Federaziun Svizra dal sport da tir sin lur pagina d'internet.
Las tiraduras ed ils tiradurs han giugà ina rolla centrala tar la fundaziun dal stadi federal. «Ils tiradurs svizzers s'engaschan per ina Svizra liberal-democratica e federalistica». Uschia statti scrit en in artitgel d'intent en ils statuts da la Federaziun svizra dal sport da tir. La pli gronda part da las uniuns da tir è naschida durant il 19avel tschientaner. Lur svilup è collià stretgamain cun la furmaziun da la Svizra moderna. Gist las festas da tir sajan stads lieus da scuntrada da la burgaisia naziunal-liberala – e dapi l'entschatta existivan relaziuns stretgas da las uniuns da tiraduras e da tiradurs cun l'armada svizra. Per incumbensa da l'armada han las uniuns da tir manà tras ils tirs obligatorics per mantegnair e promover l'abilitad da sajettar.
En sia furma actuala datti la Federaziun svizra dal sport da tir dapi l'onn 2002. Da quel temp èn s'unids la Federaziun svizra dals tiradurs, la Federaziun svizra dals tiradurs da sport e la Federaziun svizra dals tiradurs lavurants. Er ils onns avant hai dà pliras fusiuns da federaziuns naziunalas dal sport da tir. La Federaziun svizra dal sport da tir è la tschintgavel gronda federaziun da sport en Svizra. Dals 130'000 commembers han radund 60'000 ina licenza. Quests tiradurs sa participeschan a concurrenzas naziunalas, ils auters sajettan ad ina u l'autra concurrenza d'uniun mo sco hobi. Fin oz tutga il tir champester federal tar las occurrenzas da sport las pli grondas en Svizra.
L'incumbensa dal sectur dal sport d'elita è quella da promover e da sviluppar vinavant il sport d'elita en il sport da tir svizzer – quai en las disciplinas olimpicas e betg olimpicas. In mument decisiv per la federaziun è stà l'avertura dal Center naziunal da prestaziun a Magglingen 2016. Qua pon las tiraduras ed ils tiradurs selecziunads viver e trenar sco sportistas e sportists professiunals.